Bashkëpunim në financat vendore/ Nënshkruhet marrëveshja Shqipëri-Zvicër

13 Shtator 2024, 12:48, Aktualitet CNA

Bashkëpunim në financat vendore/ Nënshkruhet marrëveshja

Ministri i Financave, Petrit Malaj dhe Ambasadorja e Zvicrës, Ruth Huber

Ministri i Financave, Petrit Malaj, dhe Ambasadorja e Zvicrës, Ruth Huber, nënshkruan marrëveshjen për mbështetje të mëtejshme teknike në sistemin e financave vendore.

Marrëveshja e re formalizon vazhdimin e mbështetjes zvicerane për përmirësimin e financave publike në nivel vendor. Qeveria zvicerane përkushton gati 4.5 milionë euro për asistencë teknike për sistemin e financave publike vendore në Shqipëri.

“Marrëveshja synon përmirësimin e planifikimit strategjik dhe menaxhimit të përgjithshëm, me qëllim rritjen e të ardhurave vendore, si dhe ngritjen e sistemeve efikase për auditimin dhe raportimin financiar. Të gjitha këto objektiva janë plotësisht në përputhje me prioritetet e qeverisë për modernizimin e financave publike në nivel vendor, si dhe për rritjen e konsolidimin e autonomisë financiare”, tha ministri i Financave, Petrit Malaj.

Ministri i Financave, Petrit Malaj dhe Ambasadorja e Zvicrës, Ruth Huber

Ndërsa ambasadorja zvicerane, Ruth Huber, theksoi: “Kjo marrëveshje formalizon vazhdimin e punës sonë të përbashkët për rritjen e cilësisë së financave publike. Synimi është përmirësimi i menaxhimit të financave publike, përdorimi e burimeve publike më me eficiencë, dhe përfundimisht, dhënia e shërbimeve më të mira për komunitetet vendore”.

Projekti vendor për financat mbështet 61 bashkitë në rritjen e kapaciteteve për menaxhimin e financave të cilat njihen me instrumente dhe metoda më efikase në këtë drejtim. Gjithashtu, projekti punon me Ministrinë e Financave, Departamentin për Financat Vendore dhe drejtori të tjera, për të siguruar një koordinim dhe monitorim më të mirë të financave vendore.

Ministri i Financave, Petrit Malaj dhe Ambasadorja e Zvicrës, Ruth Huber

Kjo mbështetje u përgjigjet prioriteteve të qeverisë shqiptare sidomos në lidhje me krijimin e një sistemi buxhetor të njëjtë për të gjithë institucionet publike, reduktimin e pagesave të prapambetura, dhe standardizimin e kontrolleve të brendshme. Duke forcuar menaxhimin e të ardhurave vendore, bashkitë mund të rrisin burimet e tyre të të ardhurave.

Financimi për projektin vjen nga Sekretariati Shtetëror i Zvicrës për Çështjet Ekonomike SECO dhe zbatohet nga Universiteti i Lucernës dhe GFA Consulting Group.