Arsimi në juglindje drejt boshatisjes/ Mijëra fëmijë më pak në banka

5 Shtator 2025, 10:27, Aktualitet CNA

Arsimi në juglindje drejt boshatisjes/ Mijëra fëmijë më

Arsimi në juglindje të vendit po përballet me një nga krizat më të mëdha të viteve të fundit. Në prag të fillimit të vitit të ri shkollor, të dhënat paraprake tregojnë një rënie dramatike të numrit të nxënësve.

Vetëm këtë vit, krahasuar me një vit më parë, janë 3726 fëmijë më pak në bankat e shkollës. Bëhet fjalë për një ulje që shkon deri në 23 deri në 24 për qind, shifër që ekspertët e konsiderojnë alarmante.

Kjo rënie e madhe nuk prek vetëm statistikat, por vë në rrezik vetë funksionimin e shkollave, mësuesit dhe, në fund të fundit, të ardhmen e qindra familjeve në qytet dhe në fshatra. Nëse sot flasim për shifra, nesër kjo situatë pritet të përkthehet në mbyllje klasash, shkollash, e madje edhe në largim të mësuesve nga puna.

Artur Mano, nënkryetar i Sindikatës së Mësuesve në Korçë, thotë se kjo është një situatë e pazakontë dhe një kambanë alarmi për të gjithë.

"Ky vit shkollor është një vit jo i zakontë pasi DRAP/ZVAP Korçë, përballen me një sfidë të madhe që është rënia e numrit të nxënësve. Këtë vit, edhe pse shifrat janë ende të papërditësuara, rënia është drastike, 23-24% më e ulët. Kjo rënie drastike është kambanë alarmi që duhet të na shqetësojë të gjithëve. Rënia e numrit të nxënësve shoqërohet edhe me reduktimin e numrit të mësuesve. Është një sfidë e madhe për ZVAP Korçë, të cilën dua ta falënderoj sepse ka qenë mjaft bashkëpunuese për të mos lënë asnjë mësues pa punë. Nëse do të ketë mësues që do të mbeten pa ngarkesë mësimore, do të bëhet e pamundura që ata të sistemohen qoftë si mësues ndihmës apo edhe me mënyra të tjera."

Projeksionet për të ardhmen janë edhe më alarmante. Sipas një studimi të sindikatës, rreth viteve 2031-2032, e gjithë Korça me fshatrat përreth mund të mbeten me vetëm 120 fëmijë, duke funksionuar në rastin më të mirë me dy shkolla në qytet.

"Po përballemi me një rënie që sipas projeksioneve tona në të ardhmen, paraqitet mjaft shqetësuese. Sipas një studimi që kemi bërë ne, rreth viteve 2031-2032 e më lart, të gjithë Korçës bashkë me fshatrat, mund t'u mbeten vetëm 120 fëmijë, mund të mbeten vetëm dy shkolla në qytet. Është katastrofike kjo ulje drastike."

Më të goditurat janë zonat rurale, ku shumë shkolla rrezikojnë të mbyllen për shkak të numrit të ulët të nxënësve.

Shkolla e fshatit Belorta, me vetëm 81 fëmijë, ndodhet në prag të humbjes së drejtimit dhe do të duhet të varet nga një shkollë tjetër më e madhe.

Në rrezik janë edhe shkolla e Dishnicës, si dhe shkolla “Asdreni” në qytetin e Korçës. Rënie të ndjeshme ka pësuar edhe shkolla “Naum Veqilharxhi”, ndërsa në shkollën “Demokracia” është reduktuar posti i nënkryetarit.

"Fshatrat po përjetojnë një ulje shumë të madhe. Janë disa shkolla që rrezikohen të mbyllen drejtoritë, numri i kërkuar të ulet poshtë 80 nxënës, si shkolla e fshatit Belorta që është me 81 nxënës. Nëse bie drejtoria e shkollës, kjo shkollë do të varet nga një shkollë tjetër me një numër më të madh nxënësish. Rrezikon shkolla e Belortasë, shkolla e fshatit Dishnicë, shkolla 'Asdreni' në qytet. Ka rënie të madhe edhe në shkollën 'Naum Vegjilharxhi', por nuk është drejt mbylljes, ndërsa në shkollën 'Demokracia' pati rënie të nëndrejtorit të shkollës."

Rënia e numrit të nxënësve po kthehet në sfidën më të madhe për arsimin në juglindje. Shkollat po boshatisen, mësuesit po përballen me pasiguri, ndërsa projeksionet për të ardhmen janë edhe më alarmante.

Nëse emigracioni, ulja e lindshmërisë dhe braktisja e fshatrave vijojnë me këtë ritëm, Korça dhe gjithë rajoni rrezikojnë që brenda pak vitesh të mbeten me shumë pak fëmijë, e për pasojë me vetëm disa shkolla funksionale.

Një realitet i zymtë që nuk prek vetëm arsimin, por të ardhmen e gjithë komunitetit./ CNA