"Arsimi ka dështuar"/ Eksperti Ndriçim Mehmeti ngre alarmin

25 Janar 2024, 13:34, Aktualitet CNA

"Arsimi ka dështuar"/ Eksperti Ndriçim Mehmeti ngre

Eksperti i arsimit, Ndriçim Mehmeti, në një intervistë për CNA TV, me gazetaren Fabjona Pasho, është shprehur se gjendja e arsimit ne vend është alarmante.

Referuar rezultateve të PISA-s, Mehmeti rendit problematikat me të cilat haset sektori, nga pagat e ulëta të mësimdhënësve, e deri te mungesa e investimeve në teknologji.

"Padyshim jemi në ditën më të keqe. Kemi rezultatet e PISA-s, që janë jashtëzakonisht negative, kemi humbur disa pikë në shkencat kryesore. Kemi mungesë të një analize të thellë dhe të detajuar nga MAS. Po ashtu, kemi mbi 10 vjet që nuk bëjmë një diskutim mbi kurrikulën. Në vend që ne të flisnim për Inteligjencën Artificiale, ne flasim që nxënësit s'dinë shkrim e këndim. Për çfarë flasim?! Është ftohtë, si do ngrohet shkolla, a ka ujë të ngrohtë apo s'ka, a ka higjienë apo s'ka higjienë, a ka siguri në shkolla apo jo", u shpreh ai.

Sipas Mehmetit, reformat nuk janë koherente dhe nuk vendosen në zbatim.

"Ato s'kanë qenë reforma. Ato kanë qenë, që çohem unë në mëngjes, jap një ide dhe e quaj reformë. E para, në arsim, reformat mendohen mirë dhe e dyta reformat janë sistemike. Domethënë e marrim sistemin dhe e korrigjojmë çfarë nuk shkon, jo e hedhim poshtë. Këtu u hodh gjithë sistemi poshtë, me idenë vijmë ne dhe e bëjmë më mirë. Ne na mungon një vizion afatgjatë", u shpreh ai.

Eksperti tregon se problematika fillon që në sistemin parashkollor.

"Nëse 10 mijë familje kanë 2 fëmijë, nga kopshti, mosha e kopshtit sa zë? 30%, në numra përkthehet 120. Atëherë na duhet një kopsht me 6 grupe, na duhet një shkollë fillore, pastaj na duhet një shkollë e mesme. Cilësia që është në shkollën 'Sami Frashëri', në një 'x' shkollë tjetër, kemi një disbalancë edhe në mënyrën e mësimdhënies, edhe në cilësinë që i japim, ndërkohë që gjithë programi i Bankës Botërore ka synuar për vite me radhë cilësi dhe barazi në arsim. Ne nuk kemi as cilësi në arsim, as barazi", tha ai.

Sipas ekspertit, pasojat e rezultateve të dobëta në raportin e PISA-s do të ndihen te brezat e ardhshëm, ndërsa nuk shprehet optimist se situata do të përmirësohet./CNA