Ambasadorja e BE-së takon Manjën dhe Arben Krajën/ Mesazhe për sundimin e ligjit

6 Shtator 2022, 17:55, Aktualitet CNA

Ambasadorja e BE-së takon Manjën dhe Arben Krajën/ Mesazhe

Ambasadorja e BE, Christiane Hohmann dhe kreu i SPAK, Arben Kraja

Ambasadorja e re e Bashkimit Europian, Christiane Hohmann, ka mbajtur sot takime me Ministrin e Drejtësisë, Ulsi Manja, dhe kreun e SPAK-ut, Arben Kraja.

Lajmin e ka bërë të ditur vetë ambasadorja, e cila tregon se kanë diskutuar për sundimin e ligjit, reformat, pavarësinë e institucioneve të drejtësisë dhe luftën kundër krimit të organizuar dhe korrupsionit.

Me anë të një statusi në "Twitter", Hohmann thotë se sundimi i ligjit është shtylla kurrizore e rrugës Shqipërisë drejt BE-së.

“Takime të rëndësishme sot me ministrin e Drejtësisë Ulsi Manja dhe Kreun e SPAK-ut, Arben Kraja. Sundimi i ligjit është shtylla kurrizore e rrugës Shqipërisë drejt BE. Konsolidimi i Reformës në Drejtësi duhet të shkojë përpara.

Synimet kryesore mbeten pavarësia dhe integriteti i institucioneve të drejtësisë, gjykatat efikase dhe rezultatet në luftën kundër krimit të organizuar dhe korrupsionit të nivelit të lartë në mënyrë që qytetarët të ndihen më të sigurt dhe t’u besojnë institucioneve të tyre të drejtësisë. BE është këtu për t’ju mbështetur në këtë rrugë sfiduese”, shkruan Hohmann.

Ndërkohë, edhe Manja ka reaguar në lidhje me këtë takim.

Ambasadorja e BE-së takon Manjën dhe Arben Krajën/ Mesazhe

“Me anë të një postimi në Facebook, Ministri i Drejtësisë, Ulsi Manja, njofton se në fokus të diskutimit gjatë takimit me ambasadoren e BE në vendin tonë, ka qenë zbatimi i Reformës në Drejtësi, si dhe bashkëpunimi dhe koordinimi i punës me SPAK.

Prita sot në një takim të veçantë Ambasadoren e re të Delegacionit të Bashkimit Evropian në Shqipëri, Znj. Christiane Hohmann.

E falenderova Ambasadoren për mbështetjen që delegacioni i BE-së ka dhënë për Shqipërinë në rrugën e saj të integrimit dhe sundimit të ligjit.

Ndamë qëndrim të përbashkët për të avancuar në një stad tjetër punën tonë me zbatimin e plotë të Reformës në Drejtësi, bashkëpunimin dhe koordinimin me organet e reja të drejtësisë dhe SPAK, përfundimin e procesit të vetingut, implementimin e Hartës së re Gjyqësore, rritjen e kapaciteteve të shkollës së magjistraturës për të plotësuar vakancat në sistemin e drejtësisë, si një mekanizëm efikas për të ulur stokun e dosjeve në gjykata, etj.

Nuk patëm asnjë ndryshim në mendimet tona se lufta kundër korrupsionit dhe sundimi i ligjit është mjeti i duhur për të përshpejtuar integrimin e Shqipërisë në BE.

I kënaqur që mora siguri të plotë për mbështetjen e duhur nga delegacioni i BE-së për të gjitha temat që prekëm në takimin e sotëm”, shkruan ministri./ B.A. – CNA.al