E fundit!

13:51 Aktualitet

Protestuesit te selitë e partive/ Vrenozi: Veprim antishqiptar, PD dhe PS nuk u prekën as në '97

Demokrati i famshëm, Ilir Vrenozi ka bërë një reagim në li...

Aksi Qukës-Qafë Plloçë, punimet drejt fundit/ Nis asfaltimi, rruga do të jetë gati para vjeshtës

19 Qershor 2025, 19:59, Aktualitet CNA

Aksi Qukës-Qafë Plloçë, punimet drejt fundit/ Nis

Punimet e aksit Qukës-Qafë Plloçë, një nga më të rëndësishmit dhe një prej investimeve më të mëdha për vendin janë drejt fundit. Mësohet se punimet janë duke vijuar me ritme të shpejta në të tre lotet dhe rruga do të jetë gati para vjeshtës.

Pamjet nga kantieri i punimeve tregojnë se ka nisur asfaltimit dhe i pari segment që pritet të hapet është ai që shmang Qafën e Plloçës dhe më pas Qafë-Thanën.

Kjo vepër infrastrukturore do të shmangë kthesat e lodhshme dhe të rrezikshme, duke garantuar siguri dhe një lëvizje më të shpejtë dhe më të rehatshme drejt juglindjes, veçanërisht në muajt e dimrit kur aksi ekzistues ka shfaqur jo pak problematika.

Projekti bazë për ndërtimin e tre loteve të aksit rrugor Qukës-Qafë Plloçë është hartuar vite më parë, por për shkak të problemeve me projektin, ku u panë mospërputhje mes projektit dhe terrenit, apo mungesë fondesh, punimet për përfundimin e rrugës u vonuan. Pas një kalvari të gjatë, ky aks do të jetë i aksesueshëm shumë shpejt.

Ky projekt bën të mundur aksesimin e trafikut, që kalon ndërmjet Korridorit 8 nga aksi rrugor Tiranë-Elbasan me pjesën e juglindjes, si dhe shkurtimin e distancave me Pikën e Kalimit Kufitar të Kapshticës, qytetin e Korçës dhe më tej.

Po ashtu, rruga lehtëson trafikun, ndikon në zhvillimin e bujqësisë së zonës rurale të Mokrës dhe fshatrave përreth, si dhe shkurton kohën për transportin e mallrave nga porti i Durrësit për në Pikën e Kalimit Kufitar të Kapshticës.

Aksi Qukës-Qafë Plloçë e afron qytetin e Korçës jo më shumë se 120 kilometra nga kryeqyteti. Pra me ritmet e reja të lëvizjes së mjeteve dhe përfundimin e rrugës, distanca Korçë-Tiranë pretendohet se do të kryhet për jo më shumë se 1 orë e 30 minuta.

Segmenti i ri do të ketë gjatësi prej 43 km. Rruga në 10 km e para kalon përgjatë lumit Shkumbin dhe më pas vazhdon në malësinë e Mokrës, zonë e cila njihet si një zonë me male të larta dhe të thepisura dhe për shkak të saj do të ndërtohen një numër i madh muresh mbajtës dhe pritës, më shumë se 20 ura dhe një tunel 375 m i gjatë.

Por tashmë pritjes po i vjen fundi dhe të gjithë ata që do të udhëtojnë drejt Korçës, Pogradecit dhe zonave të ndryshme të juglindjes, do të kenë një rrugë dinjitoze./ CNA