web counter
LEXO PA REKLAMA!

SHKARKO APP

App Store
Google Play

E fundit!

x

400 milionë euro për klientelë/ Teliti: Mazhoranca u tha "Jo" 29 amendamenteve të opozitës për qytetarët

20 Dhjetor 2025, 15:28, Aktualitet CNA

400 milionë euro për klientelë/ Teliti: Mazhoranca u tha

Nënkryetari i Këshillit Bashkiak të Tiranës, Dorian Teliti, në një deklaratë për mediat, ka folur për miratimin e buxhetit 2026 të Bashkisë së Tiranës.

Sipas Telitit, ky akt nga mazhoranca ishte në shkelje flagrante të parimeve themelore të qeverisjes dhe demokracisë vendore.

Ai theksoi se në kundërshtim të hapur me rregulloren, mazhoranca përjashtoi propozimet e opozitës dhe shpërfilli interesin publik.

Teliti tha se mazhoranca u tha jo qytetarëve duke refuzuar t’i fusë në votim 29 amendamentet e opozitës.

Deklarata e plotë e Dorian Telitit:

Miratimi i projektbuxhetit 2026 të Bashkisë Tiranë nga mazhoranca e majtë në Këshillin Bashkiak ishte një akt i pastër arrogance dhe një shkelje flagrante e parimeve themelore të qeverisjes dhe demokracisë vendore. Gjatë seancës së votimit, në kundërshtim të hapur me rregulloren, mazhoranca përjashtoi propozimet e opozitës dhe shpërfilli interesin publik.

Grupi i këshilltarëve të Partisë Demokratike kishte depozituar paraprakisht 29 amendamente, të hartuara mbi bazën e shqetësimeve reale të qytetarëve, të të rinjve, familjeve, shtresave në nevojë dhe sipërmarrjes së kryeqytetit. Këto amendamente synonin korrigjimin e një projektbuxheti klientelist, të padrejtë dhe të shkëputur nga realiteti social e ekonomik i Tiranës.

Mazhoranca u tha JO qytetarëve

Duke refuzuar t’i fusë në votim 29 amendamentet tona, mazhoranca socialiste tha JO për:

• Uljen me 30% të taksës së pronës

• Përgjysmimin e tarifës së pastrimit për familjet dhe bizneset

• Përgjysmimin e tarifave të parkimit

• Uljen e taksës së ndikimit në infrastrukturë për ndërtimet e reja, masë që do të ulte çmimin e banesave për çiftet e reja.

Mazhoranca u tha JO:

• Çerdheve dhe kopshteve falas

• Subvencionimit të ushqimit për nxënësit

• Kompensimit të çmimit të rritur të ujit, derisa Tirana të ketë furnizim 24 orë

• Subvencioneve direkte për fermerët e Tiranës.

Amendamentet tona parashikonin investime të domosdoshme në arsim, siguri dhe të ardhmen e të rinjve, duke përfshirë ndërtimin e institucioneve të reja arsimore, rritjen e sigurisë pranë tyre dhe krijimin e kapaciteteve publike për strehimin studentor. Refuzimi i këtyre investimeve tregon se për mazhorancën prioritet nuk është e ardhmja e qytetit, por mbajtja e pushtetit me çdo kusht.

Mazhoranca i tha PO abuzimit me fondet

Amendamentet tona synonin:

• Ndalimin e pagesave për shërbime që nuk ekzistojnë, duke filluar nga inceneratori inekzistent

• Uljen e shpenzimeve operative dhe administrative

• Eliminimin e fondeve për marketing dhe evente propagandistike

• Alokimin e këtyre fondeve drejt shërbimeve sociale, qendrave komunitare dhe mbështetjes për të moshuarit

Të gjitha këto u rrëzuan pa asnjë argument.

Të dashur qytetarë,

Buxheti prej mbi 400 milionë eurosh për vitin 2026, i miratuar vetëm me votat e mazhorancës dhe i kundërshtuar fort nga opozita, nuk u jep zgjidhje asnjërës prej sfidave të vërteta të kryeqytetit. Është një buxhet për propagandë dhe klientelë; një buxhet që mban gjallë modelin e qeverisjes pa transparencë dhe pa llogaridhënie; një buxhet që rëndon qytetarët dhe bizneset.

Ky akt është një arsye më shumë për të reaguar ndaj arrogancës, përjashtimit social, vjedhjes dhe shpërdorimit të parasë publike.

Ditën e hënë, ora 18:00, ju ftojmë të gjithëve të mblidhemi në bulevardin “Dëshmorët e Kombit”, për të mbrojtur interesin publik dhe për të kërkuar një qeverisje që punon për njerëzit – jo për pushtetin dhe orekset e tij./ CNA





Lajmet e fundit nga