Padia ndaj Blinken/ Berisha tregon çfarë po ndodh me gjyqin në Francë

20 Maj 2022, 11:08, Politikë CNA

Ish-kryeministri Sali Berisha, foli sot edhe në lidhje me çfarë po ndodh me gjyqin për shpifje ndaj Sekretarit të Shtetit, Antony Blinken.

?Gjyqin në Francë po e ndjek me shumë angazhim avokati im, të cilit i kam dhënë besimin e plotë.

Por, siç e kam njoftuar, janë faktorë pro dhe faktorë kundër meje. Kundër meje është fakti se as unë dhe as Sekretari i Shtetit nuk jemi shtetas francezë. Por mund të them diçka më shumë, nuk jemi as shtetas të Bashkimit Europian dhe kjo nuk është në favor. Nuk është në favor edhe fakti se Sekretari i Shtetit është personalitet me imunitet.

Në favorin tim janë dy faktorë, faktori se në një parim ndërkombëtar, nuk mund të them se është ligj i sanksionuar nga OKB-ja, por shpifja dënohet aty ku del. Pra, edhe në Shqipëri mund të dënohet. Por imagjino të hapësh gjyq në Shqipëri. Aty ku del, ku e dëgjojnë dhe e shikojnë njerëzit. Së dyti, vërtet Sekretari i Shtetit është pa dyshim një njeri me imunitet, por shpifja në themel nuk hyn te veprimtaritë zyrtare. Për shembull, në Kushtetutën e Shqipërisë ka një nen që thotë: deputeti është përgjegjës para ligjit për shpifjet që bën në parlament. Mbrohet deklarata e tij, por nuk mbrohet shpifja që mund të bëjë ndaj cilitdo.

Kjo tani mbetet në diskrecionin e gjykatësit. Se si mund të vendosë ai, nuk e di. Por procedura gjyqësore do të jetë e pandërprerë. Nëse këta faktorë dalin kundër meje, pasi të shqyrtoj përgjigjen, të këshillohem me avokatin, do të shoh hapësirat e tjera.

Unë do të vazhdoj rrugën gjyqësore dhe atë të transparencës, e cila ka ecur. Gjer sot janë mbi 45 publikime në SHBA në tërësi, dhe vende të tjera, që kanë faktuar se nuk ekziston asnjë provë, fakt, dokument për atë vendim. Që është mirëfilli politik. Është përdorur ligji për qëllime politike, bazuar në shpifjen e Edi Ramës,? -tha Berisha, gjatë një konference për mediat.

Ai shtoi më tej se fushata brenda PD-së e ka penguar në këtë drejtim.

?Për faktorin kohë, vetëm më ka penguar sepse po të mos isha marrë me këtë aktivitet politik, në rrafshin e transparencës do të kisha bërë shumë më tepër. Ata që flasin, flasin krejtësisht pa ndonjë bazë,? -tha Berisha.