web counter
LEXO PA REKLAMA!

SHKARKO APP

App Store
Google Play

E fundit!

x

Ukraina, përpjekje për të evakuuar trupat e fundit nga Mariupoli

17 Maj 2022, 13:32, Kosova & Bota CNA

Ushtria e Ukrainës vazhdoi të martën përpjekjet për të evakuuar luftëtarët e mbetur në fabrikën e çelikut Azovstal në Mariupol, ku tre muaj bombardime ruse e kanë kthyer në gërmadha qytetin port.

Zyrtarët ukrainas thanë se mbi 260 luftëtarë u evakuuan të hënën.

Pesëdhjetë e tre luftëtarë të plagosur rëndë u dërguan në një spital në Novoazovsk, në lindje të Mariupolit, tha zëvendës Ministrja e Mbrojtjes Anna Malyar. Novoazovsk është nën kontrollin e trupave ruse dhe separatistëve të mbështetur nga Rusia.

211 luftëtarë të tjerë u dërguan në qytetin Olenivka, një zonë e kontrolluar gjithashtu nga separatistët e mbështetur nga Rusia, tha zonja Malyar, duke shtuar se të evakuuarit mund të shkëmbeheshin me të burgosur rusë.

Marrja nën kontroll të plotë nga forcat ruse e Mariupolit do të shënonte një moment historik të rëndësishëm, pasi do të përbënte fitoren më të madhe të Rusisë në luftë deri tani dhe mund të bënte të mundur dërgimin e forcave që mbante në Mariupol, në zona të tjera luftimi në Donbas, qendra industriale e Ukrainës lindore, që tani është fokusi i Moskës.

Gjatë një fjalimi gjatë natës, presidenti ukrainas Volodymyr Zelenskyy foli për evakuimin e ushtarëve nga Mariupoli.

“Dua të theksoj se Ukrainës i duhen të gjallë heronjtë ukrainas. Ky është parimi ynë,” tha Zelenskyy. “Unë mendoj se çdo person i arsyeshëm do t’i kuptojë këto fjalë. Operacioni për shpëtimin e mbrojtësve të Mariupolit nisi nga oficerët tanë ushtarakë dhe të zbulimit. Puna vazhdon për t’i sjellë djemtë në shtëpi dhe ky mision kërkon kujdes dhe kohë.”

Zv/ministrja Malyar tha se po bëhen përpjekje për të shpëtuar luftëtarët e mbetur brenda fabrikës që ishte bastioni i fundit i rezistencës në qytetin port të shkatërruar të Mariupolit.

“Ata përmbushën të gjitha detyrat e tyre. Por është e pamundur të zhbllokohet Azovstali me mjete ushtarake”, tha ajo.





Lajmet e fundit nga