“Fatura e zullumit është 10 miliardë euro”/ LSI radhit aferat që nervozojnë Ramën

11 Maj 2022, 08:50, Politikë CNA

Nënkryetari i LSI-së, Petrit Vasili, ka reaguar sërish në lidhje me deklaratat e kryeministrit Edi Rama për drejtësinë.

Sipas tij, Rama tani është edhe drejtues i SPAK-ut, Kryetar i KLGJ-së, Kryetar i KLP-së, Kryetar i Vetingut dhe Inspektor i Lartë i Drejtësisë.

Më tej Vasili ka radhitur aferat që e detyrojnë Ramën të sulmojë SPAK-un dhe drejtësinë në tërësi.

?Rrëmbeu çdo pushtet, rrëmbeu çdo fond publik ndaj tani s’ka me kë ta ndajë përgjegjësine e zullumit përveç vetes.

Ne krye të gjithçkaje është vetëm ai, Rama!

Rama e di këtë,ndaj i bën presion SPAK- ut, që të mos veprojë.

Fatura e zullumit është 10 miliard euro?, shkruan Vasili në rrjete sociale.

Aferat sipas Vasilit

Koncesioni i Rrugës së Kombit.

Koncesioni i Aeroportit Ndërkombëtar të Rinasit.

Koncesioni i Aeroportit të Kukësit.

Afera e depozitave të naftës në Porto Romano.

Afera e Astririt, ku kilometri i Rrugës shkoi 25 milionë euro.

Rruga Kardhiq-Delvinë, që nuk mbaron kurrë e ndërkohë ha miliona pa mbarim.

Rruga e Arbërit dhe tunelet, që kushtojnë 38 milionë euro kilometri.

Afera e frikshme e Portit të Durrësit të kundërshtuar fort nga vetë Bashkimi Europian.

Afera e Butrintit, që nga shkatërrimi i parkut Kombëtar e deri te vetë siti i çmuar arkeologjik.

Koncesioni i plazhit të Gjeneralit.

Shitja e ARMO për skrap.

Koncesioni i CHECK UP-it.

Prishja e Parkut pas Universitetit të Tiranës për ndërtime dhe rrugë për llogari të oligarkëve, që shkatërrojnë edhe te vetmin gjelbërim të mbetur në Tiranë.

Katet pa leje të kullave të oligarkëve në mes të Tiranës, kur qytetarët çohen në polici për një dritare apo riparim banese.

Licencimin e bankave me aksionerë të regjistruar në OFFSHORE.

Aferën shumë të rëndë të Teatrit Kombëtar.

Aferën e vendosjes së çmimeve të naftës dhe ushqimeve, në pazar te hapur qeveri dhe oligarkë, ku këta të fundit kanë po vetë monopolet e tyre të mbështetur nga qeveria.

Inceneratorët dhe qindra milionat e vjedhura në to.

Arbitrazhe të humbura me qindra miliona euro për faj të qeverisë, një dëm i pallogaritshëm ky, për ekonominë shqiptare.

Dhjetëra Ligje dhe VKM të bëra me porosi të oligarkëve, ku deputetët e ministrat rilindas me Ramën në krye kanë votuar në Parlament e Qeveri.

Qindra miliona euro të rindërtimit të përdorura hapur për të blerë vota.

Qindra miliona euro tendera sekretë të miratuar nga qeveria e tij për pandeminë me çmime dhjetëra herë më të larta.

Fshehja kriminale nga ai dhe qeveria e provuar botërisht, e mijëra qytetarëve që humbën jetën nga Covid./CNA.al