web counter
LEXO PA REKLAMA!

SHKARKO APP

App Store
Google Play

E fundit!

x

Korçari Devid Fejzulla debuton me gol, Dinamo mundet nga Laçi

17 Prill 2022, 14:07, Sport CNA

Ka përfunduar me emocione ndeshja mes Laçit dhe Dinamos, ku kurbinasit kanë triumfuar në shtëpi me rezultatin 2-1 ndaj bluve të kryeqytetit, e vlefshme për javën e 29-të në Kategorinë Superiore. Sfida nisi vrullshëm me kurbinasit në avantazh pas 35 sekondash, ku Saliu Guindo ka shënuar dhe duke mposhtur portierin e dinamovitëve, Simon Simoni.

Goli i barazimit erdhi nga një debutues, 19-vjeçari korçar Devid Fejzulla, i cili ka ndihmuar blutë e kryeqytetit të rikthenin baraspeshën. I riu i cili u soll te skuadra dinamovite nga trajneri Bledi Shkëmbi në fillim të sezonit si një talent me prespektivë, po fiton nga java në javë besimin e trajnerit italian të Dinamos Vanoli dhe sot ka debutuar me gol, madje ka bërë edhe një paraqitje fantastike.

Ndeshja kishte ritëm dhe emocione, ku për shumë minuta u zhvillua nga porta në portë duke shpërdoruar të dyja skuadrat shumë raste që mund të shkonin në avantazh. Në minutën e 86? ishte Dejan Zarubica, i cili rikthehet pas shumë ndeshjesh për të luajtur duke shënuar me penallti për kurbinasit, pas kontaktit që kishte Julian Shehu me Rexhinaldon në zonë.

Kjo fitore konfirmon Laçin në vendin e dytë duke grumbulluar 50 pikë, ndërsa Dinamo nuk përfiton nga humbja e Egnatias dje ndaj Tiranës, dhe blutë aktualisht janë me një këmbë në Kategorinë e Parë, ku renditen në vendin e parafundit në kuotën e 23 pikëve, -8 nga rrogozhinasit, të cilët mbajnë pozicionin e ?Play-Out?-it.





Lajmet e fundit nga