Protesta në të gjithë vendin/ KSSH thirrje urgjente qeverisë, ja 11 kërkesat pas rritjes së çmimeve

10 Mars 2022, 20:41, Aktualitet CNA

Konfederata e Sindikatave të Shqipërisë (KSSH), ka reaguar në lidhje me rritjen e çmimeve të karburanteve dhe produkteve ushqimore.

Në një deklaratë për mediat, KSSH i kërkon qeverisë Shqiptare dhe veçanërisht Komisionit të posaçëm qeveritar mbledhjen e tij urgjente dhe marrjen e vendimeve të shpejta, operative, të kushtëzuara nga situata e krijuar.

Ndërsa paralajmëron protesta në të gjithë qytetet duke nisur nga nesër.

“KSSH po e ndjek me vemendje dhe hap pas hapi situatën e vështirë social-ekonomike të krijuar nga rritja e çmimit të karburantit dhe shumë produkteve të tjera ushqimore apo të konsumit të përditshëm.

Duke njohur vështirësitë e krijuara nga lufta pushtuese e Rusisë ndaj Ukrahinës.

Duke njohur ndikimin e drejtpërdrejtë dhe të tërthortë që ky konflikt po jep në ekonominë ndërkombëtare dhe drejtpërsëdrejti në ekonominë e vendit tonë.

Duke njohur situatën e vështirë për mirëqeverisje, krijuar nga politika konfliktuale e një opozite të përçarë, pa alternativë dhe anemike dhe të një qeverie ravanshiste, jo transparente dhe jo bashkëpunuese.

Duke vlerësuar ndërhyrjen e qeverisë për mos rritje të çmimit të energjisë elektrike për familjarët dhe biznesin e vogël, falë kjo mundësisë së prodhimit vendas të energjisë elektrike.

KSSH në përmbushje të misionit të saj si mbrojtjëse dhe përfaqësuese direkte e punëtorëve dhe e qytetarëve Shqiptarë, solidarizohet, mbështet dhe bashkohet me protestat bashkëpopullore që po organizohen këto ditë në të gjithë vendin tonë.

Duke ruajtur identitetin e saj, pavarësinë e saj ekonomike dhe politike, KSSH fton edhe sindikata të tjera simotra në vendin tonë që t?i bashkohen kësaj kauze dhe së bashku të bëjmë thirrje të gjithë anëtarëve tanë, të gjithë të punësuarve, të papunëve, grave dhe vajzave, burrave dhe djemve, të rejave dhe të rinjve, pensionistëve, të papunëve, të vetëpunësuarve, bujqëve, blegtorëve, artizanëve, punonjësve të shërbimit publik dhe privat në turizëm, tregti, transport etj, që të bashkohen me protestat tona dhe me protestat e të gjithë Shqiptarëve për të frenuar dhe për të ulur çmimet e karburanteve, drithërave të bukës, produkteve ushqimore, shërbimeve publike, transportit etj.

KSSH kërkon qeverisë Shqiptare dhe veçanërisht Komisionit të posaçëm qeveritar mbledhjen e tij urgjente dhe marrjen e vendimeve të shpejta, operative, të kushtëzuara nga situata e krijuar për:

-Uljen dhe reduktimin e taksave mbi karburantet përfshirë dhe TVSH deri në Shtator 2022

-Fillimin e menjëhershëm të indeksimit vjetor të pagave dhe pensioneve duke filluar nga Marsi i këtij viti

-Rritjen e menjhershme të pagës minimale me 30% dhe me të njëjtin ritëm rritjen e pagave në tërësi

-Rritjen e asistencave sociale dhe pagesave të papunësisë me 40%

-Kontrollin e rreptë të agjencive ligj-zbatuese që operojnë për kontrollin dhe mirëfunksionimin e tregut në fushën e karburanteve dhe industrisë së tregtisë ushqimore, duke dënuar rreptë spekulantët dhe abuzuesit

-Subvencionim të menjëhershëm të transportit publik, urban, interurban dhe taksi

-Marrjen e masave urgjente për kursim të mundshëm të energjisë elektrike aty ku është e mundur. Inkurajim dhe lehtësim të prodhimit vendas me burime ujore alternative, fotovoltaike etj

-Sigurimin e transparencës me publikun, nëpërmjet zhvillimit të debatit konstruktiv me sindikatat, botën akademike dhe shoqërinë civile duke eleminuar propagandën shfrenuese qeverisëse pa debat dhe transparencë publike

-Uljen në 0 TVSH për vitin 2022 të produkteve themelore të shportës si: Buka, mielli, vaji, qumështi, vezët, orizi etj.

-Shikimin e mundësisë për të vendosur për një kohë të shkurtër emergjente çmimin tavan për karburantet dhe për të ulur marzhin e fitimit nga 6-7 % që është sot në 2 %

-Uljen e burokracive shtetërore për subvencionet në Bujqësi, veçanërisht për karburantin për punimin e tokës

KSSH është e gatshme të ulet me qeverinë, me politik-bërjen dhe vendimmarrjen në interes të publikut, qytetarve e punëtorëve Shqiptarë për të bashkëvendosur për një paketë sociale emergjente me synim marrjen në mbrojtje të shtresës së varfër, të pamundur të popullatës, si dhe të punëtorëve që humbin vendet e punës apo preken direkt nga pasoja e krizës ekonomike të rritjes së çmimeve të karburanteve dhe të energjisë elektrike

Krahas kësaj, për të motivuar qeverinë, për të sensiblizuar publikun, KSSH do të protestojë duke filluar që nga dita e nesërme, në mënyra kapilarë në të gjithë vendin me qëllim që të merren masat e duhura dhe urgjente. Zëri ynë do të bashkohet me zërin e qindra mijëra Shqiptarëve të cilët kërkojnë qevrisë ndërhyrje urgjente për kapërcimin e kësaj situate të vështirë.

Protestat tona fillojnë nesër në orën 16:00 në sheshin qëndror të Durrësit, pasnesër në orën 11:00 në sheshin qëndror të Pogradecit dhe me fillimin e javës tjetër do të protestohet çdo ditë në Tiranë, Shkodër, Vlorë, Gjirokastër, Berat, Elbasan, Korçë, Dibër etj.

Asambleja e Përgjithshme e KSSH e mbledhur me dt 10.03.2022″/CNA.al