Politikë e jashtme feministe/ Dëshirë apo realitet?

8 Mars 2022, 13:43, Kosova & Bota CNA

Qeveria gjermane për herë të parë angazhohet hapur për një politikë të jashtme feministe. Kryediplomatja Annalena Baerbock e ka vënë në qendër këtë temë tani në hijen e luftës. Mbi qasjen feministe në politikë më 8 Mars.

Aty ku ka luftë, politika e jashtme feministe duket në vështrim të parë një mjet i kufizuar kundër atyre që luftojnë. Në fund të fundit objektivi më i lartë i një politike të jashtme është që gjërat të mos vijnë kurrë deri tek lufta. Por në të njëjtën kohë qasjet feministe në situata konflikti po marrin peshë, sepse janë pikërisht gratë që në situata të tilla kanë nevojë për mbrojtje të veçantë.

Në Gjermani për këtë temë si asnjë tjetër më parë angazhohet ministrja e re e Jashtme gjermane, Annalena Baerbock (Të Gjelbrit/Aleanca/90). Qoftë në Donbas apo në konferencën e shtypit në Egjipt, kryediplomatja 41 vjeçarja, vetë nënë e dy fëmijëve flet demonstrativisht edhe si grua. Kjo perspektivë është kthyer ndërkohë në një pjesë të rëndësishme të fjalimeve të saj. Në vizitat e saj ajo takon shpesh në fillim gratë, dhe organizatat aktive në terren, para se të ulet në në një tryezë me përfaqësuesit meshkuj të qeverive në një tryezë.

Ministrja e Jashtme i vë përballë “narrativit të zonave gjeopolitike të influencës të shteteve të fuqishme pa asnjë hezitim edhe një narrativ tjetër, narrativin e të drejtave të njeriut dhe sigurisë njerëzore”, shprehet politikanja për çështjet e mbrojtjes, Agniezska Brugger. Në Konferencën e Sigurisë në Mynih së fundmi, Baerbock e përkufizoi marrëveshjen e Minskut edhe në konteksin e politikës së jashtme feministe. “Ajo nuk është vetëm një format negociimi, apo format teknik”. Bëhet fjalë për “sigurinë e njerëzve. Bëhet fjalë, nëse familjet, fëmijët në mes të Europës, në mesin e Europës, rriten të sigurtë dhe në paqe”, tha Baerbock dhe citoi nënat që kishte takuar në fillim të shkurtit në Donbas. “Vetëm kur femrat të jenë të sigurta, jemi ne të gjithë të sigurtë.”

Siguria në duart e gruas

Edhe në marrëveshjen e koalicionit qeveria gjermane shprehet qartë për një politikë të jashtme feministe. “Së bashku me partnerët tanë ne duam në kuptimin e një politike të jashtme feministe të forcojmë të drejtat, kapacitetet dhe përfaqësimin e grave dhe vajzave në të gjithë botën dhe të nxisim diversitetin shoqëror.” Për këtë arsye synohet të emërohen “më shumë gra në pozicione drejtuese ndërkombëtare.”

Përkatësisht në qeverinë e re gjermane të gjitha postet e lidhura me sigurinë janë tanimë në duart e grave. Ministria e Jashtme, e Mbrojtjes dhe ajo e Brendshme janë në duart e grave, po ashtu edhe e ngarkuara për Bundeswehrin, dhe drejtuesja e komisionit parlamentar të mbrojtjes.

Por qëllimi nuk është tek personeli. Përgjegjës për më shumë politikë të jashtme feministe në Ministrinë e Jashtme është një burrë, Tobias Lindner nga Të Gjelbrit. “Kjo nuk duhet të mbesë vetëm një temë për gratë. nuk bëhet fjalë për zënien e posteve me gra, por për atë që të bëhet e qartë perspektiva e gruas në konflikte, dhe këtë e ka detyrë një burrë”, komenton Brugger.

“Çështja nuk është se tani që po vijnë gratë dhe ka më pak kriza, kjo do të ishte naive”, thotë kryetarja e komisionit parlamentar të mbrojtjes në Bundestag, Agnes-Marie Strack-Zimmermann. Konflikti në Ukrainë nuk mund të zgjidhet shpejt nga gratë, por kjo nuk ndryshon asgjë në atë që “në apektin e politikës botërore duhet të mos ketë vetëm një perspektivë të burrit”./DW