Skandali me aferën e inceneratorëve/ Milionat që kanë përfituar Stela Gugallja dhe Klodian Zoto

8 Shkurt 2022, 21:07, Aktualitet CNA

Skandali me aferën e inceneratorëve/ Milionat që kanë

Historia e koncesionit të inceneratorëve në Shqipëri është një skandal që vijon të thellohet. Gazetari dhe editori i CNA.al, Elvi Fundo ka zbuluar detaje dhe dokumenta të tjera në lidhje me inceneratorin e Fierit, Elbasanit dhe Tiranës.

Në një lidhje direkte në emisionin “Now” me Erla Mëhillin, gazetari është shprehur se tek inceneratori i Fierit janë shkelur afatet dhe se shkelja e dytë është fakti që kompania nuk e ka ndërtuar inceneratorin me lekët e saj.

“Tek Fieri janë afatet e shkelura. Shkelja e dytë është fakti që kompania ka marrë kontratë me PPP, nuk e ka ndërtuar me lekët e saj.Tek Fieri ka të tjera problematika të cilat lidhen edhe me shitje aksionesh dhe janë bërë me një vlerë qesharake prej 30 mijë lekë të reja.

Në Fier përfshihet një kompani që ka një person të arrestuar pak kohë më parë, të hetuar për krim ndërkombëtar dhe është ekstraduar në Spanjë ose Itali për trafik droge, një kompani që po kryen hetimet që është kontraktor.

Ka edhe fatura fiktive. E gjithë skema koncesionare ndërtohet mbi bazën e një oferte dhe oferta duhet të ketë bashkëngjitur një studim fizibiliteti. Kompanitë e kanë kryer studimin e fizibilitetit dhe në momentin që këto janë fryrë janë hapësirat e parave që kanë paguar këto kompanitë?, tha Fundo.

Ndër të tjera, gazetari Elvi Fundo ka theksuar se pas të dhënave që ka publikuar më parë për pagesat që u jepeshin mediave, inceneratori i Tiranës dhe inceneratori i Fierit i paguajnë në mënyrë sistematike dy kompanive Zoto Consulting në pronësi të Klodian Zotos dhe Consulting SE Partners në pronësi të Stela Gugalles shuma që shkojnë në qindra mijëra euro në vit.

“Inceneratori i Elbasanit dhe i Fierit kushtojnë nga 15 milionë euro. Në Fier shkojmë 28, në Elbasan shkojmë 22, është një vakum 6 milion euro në Elbasan. Sipas të dhënave që unë kam nxjerrë rreth një muaj më parë për pagesat që u jepeshin mediave, inceneratori i Tiranës dhe inceneratori i Fierit i paguajnë në mënyrë sistematike dy kompanive Zoto Consulting dhe Consulting SE Partners në pronësi të Stela Gugalles shuma që shkojnë në qindra mijëra euro në vit. Paguan dhe inceneratori i Fierit, i Elbasanit dhe ai i Tiranës. Të treja bashkë, kanë paguar shumë herë më tepër se dy milion euro”, vijoi më tej gazetari./CNA.al