Nga Leon Menkshi/ Festival me 'brekë' borxh!

28 Dhjetor 2021, 20:06, Opinione CNA

Festivali i 60 i një institucioni 83-vjecar si RTSH (me fillesa që në vitin 1938) çeli mbrëmë siparin e një jubileu që ngjau më shumë me nje përçudnimin nën logon e një televizioni pa fytyrë e pa identitet. Drejtues mediokër të RTSH-së, të sprovuar ndër vite si puthadorës të politikës majtas e djadhtas, kanë kohë që vegjetojnë në televizionin e parë e të vetëm që paguhet nga taksat e shqiptarëve; ata, mbrëmë më shumë se kurrë, i kanë vënë vulën e turpit këtij televizioni dhe vetë Festivalit, i cili ka vite që kontestohet për prurje përgjithësisht të dobëta muzikore dhe për braktisjen nga emrat e spikatur të këngës.

Mbrëme ky Festival erdhi në një ’60-vjetor turpi’ më i pocaqisur se kurrë; me regjisor e prezantues të ricikluar nga televizionet private, nën një skenografi e grafikë ‘patatinash’, skenar të dobët e mikrofona difektozë, duke shëmbëllyer më shume me nje ‘ Street art event’ (aktivitet rrugësh) se sa një event tradite siç është në të vërtetë “Festivali i Këngës” – një nga më të vjetrit në kontinent – por që fatkeqësisht RTSH-ja ka vite që s’e ‘katranos’ dot vetë, pa marrë borxh te privati njëhere ‘brekët’ e njëherë ‘sytienat’ (…e dhimshme dhe e turpshme për ‘gjigandin’ e vetëm të medias publike në vend, që gllabëron miliona lek nga taksat e shqiptarëve dhe operon me një ‘ushtri’ prej mbi 1000 të punësuarish, por ‘sigurisht’ pa këllqe për të dalë me fytyrën e vet në një jubile si ky i Fest 60).

I shkruaj i keqardhur këto rreshta, si një prej ish-figurave të RTSH-së dhe Festivaleve (‘fytyra’ e lajmeve shqip e anglisht për plot 8 vite në RTSH, drejtues i tre festivaleve të këngës në 1990, 1991 e 2004, e i mjaft eventeve/spektakleve të rëndësishme në skenë e ekran, nën logon e RTSH-së e jo vetëm…!). Ndihem thuajse i obliguar të mos hesht sot, kur i distancuar nga RTSH dhe rehtuar në punët e mia, shoh se si ky institucion vazhdon të endet në duar mediokrish të padenjë e njëherersh të shumëpërfolur për afera korruptive, e për malinjitet të pashoq, në mënyrën e trajtimit, demotivimit …deri në largim të profesionistëve me integritet e kontribute afatgjata në RTSH. Kjo qasje e sjellje prej pushtuesi, e ka katandisur RTSH-në në një televizion pa fytyrë e pa identitet, që edhe në 60-vjetorin e Festivalit merr ‘borxh’ regjisorin nga Topi, prezantuesit nga Topi…Klani…e kioska te tjera, sepse në ekzistencën e saj 83 vjeçare si media, s’ka mundur dot të mbajë asnjë nga të vetët (të rinj e të vjetër)!

Fatmirësisht, koha është ajo që krijon memorje kolektive, e që në syrin publik i jep vleresimin apo përçmimin e merituar çdo individi apo person publik; me kohën jane harruar mbretër…e jo më ca zvarranikë rudimentarë që s’kanë mundur kurrë të qëndrojnë në këmbët e veta pa intriga e pa lëpirë!

_______________________________

Nga RTSH dhashë dorëheqjen në verën e vitit 2012 për t’ju bashkuar programit prestigjioz Fulbright në Amerikë së bashku me 19 profesionistë të spikatur në fushën e medias audio-vizive, nga mbarë bota, duke hapur perspektiva e mundësi të reja profesionale për mua, …me gjasa për të mos u rikthyer më në RTSH për sa kohë që skutha pa shkollim e pa vizion vazhdojnë të gëlojnë si shushunja koridoreve të atij institucioni, duke e mbajtur ende ‘peng’.