Olsian Çela e çoi në hetime/ Shkarkohet Prokurori

17 Dhjetor 2021, 10:54, Aktualitet CNA

Me votë unanime, KLP vendosi të pranojë kërkesën e ILD për dhënien e masës disiplinore “Shkarkim nga detyra” për prokurorin Shkëlqim Kokona prokuror në Prokurorinë pranë Gjykatës së Shkallës së Parë.

Kujtojmë se, Inspektoriati i Lartë i Drejtësisë, ka kërkuar shkarkimin nga detyra të prokurorit Shkëlqim Kokona për shkelje të rënda profesionale.

Ka qenë kryeprokurori Olsian Çela, i cili në Tetor të vitit 2020 i ka kërkuar Inspektorit të Lartë të Drejtësisë nisjen e procedurës së inspektimit për hetimin e prokurorit të Pogradecit Shkëlqim Kokona.

Në një deklaratë për media Prokurori i Përgjithshëm bënte me dije se pas informacioneve të marra nga Drejtuesi i Prokurorisë pranë Gjykatës së Rrethit Gjyqësor Pogradec, Sektori i Monitorimit në Prokurorinë e Përgjithshme ka vijuar me ndjekjen dhe monitorimin e rastit, duke konstatuar veprime të cilat përbëjnë indicie për shkelje disiplinore në ushtrimin e detyrës nga ana e prokurorit Kokona.

Nga hetimi disiplinor i kryer nga Inspektori i Lartë i Drejtësisë mbi veprimtarinë hetimore të magjistratit në periudhën 2018-2021 u provua se magjistrati ka sjellje të përsëritur refuzuese në mosmarrjen në dorëzim të dosjeve; ka mospjesëmarrje të përsëritur në seanca gjyqësore; ka kryer përfundim të çështjeve me vendim si prokuror, pa proceduar me kalimin e tyre me kërkesë në gjykatë dhe mosnxjerrje të urdhërave për ekzekutimin e vendimeve gjyqësore të dënimit me burgim.

Hetimi disiplinor i ILD provoi se nga ana e magjistratit Kokona, ka patur shkelje të përsëritur dhe të rëndë të rregullave të solemnitetit, rregullave të mirësjelljes në marrëdhëniet me palët, me drejtuesit e prokurorisë, me gjyqtarët, me oficerë të policisë gjyqësore, si dhe me personelin e adminstratës së prokurorisë dhe të gjykatës.

Sjelljet e magjistratit, sipas ILD kanë sjellë shkelje të rënda profesionale, diskretitim të pozitës dhe figurës së prokurorit, si dhe kanë cënuar besimin e publikut te drejtësia.

Për pasojë Inspektori i Lartë i Drejtësisë kërkoi nga KLP shkarkimin nga detyra, të prokurorit SH.K. për shkeljet disiplinore të parashikuara nga neni 148/d pika 2, shkronja ?a? e Kushtetutës së Republikës së Shqipërisë dhe nga neni 102, pika 1 shkronja ?b? nënpika ?ii?, neni 102 pika 1 shkronja ?ç?, ?d?, ?dh?, ?g? dhe neni 102 pika 2 shkronja ?a? dhe ?dh? të ligjit nr. 96/2016 ?Për statusin e gjyqtarëve dhe të prokurorëve./A.E-CNA.al