Kërkesa e PS për zgjatjen e mandateve të KPK dhe KPA/ Ylli Manjani: Jo në dorë të partive, Kushtetuta e ka një zgjidhje

21 Shtator 2021, 19:58, Aktualitet CNA

Ish ministri i Drejtësisë, Ylli Manjani ka komentuar kërkesën e mazhorancës për bashkëpunim me opozitën për ndryshimet kushtetuese dhe mbi zgjatjen e mandatit të organeve të vetingut.

Manjani thotë se në vitin 2023 përfundon mandati i KPK sipas Kushtetutës dhe se PS po propozon që të ndryshohet Kushtetuta në mënyrë që të zgjatet mandati i KPK dhe KPA.

?Këto ndryshimet kushtetuese, ku në vitin 2018 filluan punë institucionet e vetingut për gjyqtarët dhe prokurorët dhe sipas kushtetutës, jetëgjatësia e shkallës së parë KPK është 5 vjet dhe apeli apo shkalla e dytë KPA është 9 vjet. Nga viti 2023 mbaron mandati i KPK sipas kushtetutës. PS propozon që të ndryshojmë kushtetutën dhe tja zgjasim mandatin KPK dhe KPA me arsyetimin se nuk ka pëfunduar vetingu. Nuk ka arritur akoma as gjysma e rasteve të vetuara. Edhe sa vjet na duhen për të mbaruar vetingu i gjysmës tjetër?, ka thënë Manjani i ftuar në Syri Tv në emisionin “A Show”.

Ish ministri i Drejtësisë, shprehet se pas mbarimit të mandatit, Kushtetuta ka një zgjidhje. Manjani thote se pas shpërbërjes së Komisioneve, rastet të cilat nuk janë përfunduar shqyrtohen nga Këshilli i Lartë Gjyqësor, Këshilli i Lartë i Prokurorisë me ndihmë të inspektoriatit dhe drejtorit të Prokurorisë së Posaçme.

?Na ka mbetur gjysma e gjyqtarëve dhe prokurorëve të pa vetuar nga mbarimi i mandatit të këtyre organeve. Çfarë ndodh kur u mbaron mandati? Kushtetuta e ka dhënë zgjidhjen për këtë rast, nuk ja ka lënë në dorë as Ramës, as Ballës as Bashës me të tijët. Neni 179 pika b e kushtetutës e parashikon se pas shpërbërjes së këtyre komisioneve, rastet të cilat nuk janë përfunduar, shqyrtohen nga Këshilli i Lartë Gjyqsor, Këshilli i Lartë i Prokurorisë dhe ndihmon inspektoriati dhe drejtori i Prokurorisë së Posaçme.

Kjo është formula kushtetuese. Nëse nuk bëhen këto ndryshime, vetingu i gjyqtarëve dhe prokurorëve vazhdon, nuk ndërpritet sepse e ka parashikuar kushtetuta.

Vetingun e bëjnë institucionet e ngritura me ligj.Vetingu është një proces i natyrshëm që ndodh gjithandej edhe kur ti fillon një punë?, shprehet Manjani./ CNA.al