E fundit!

15:37 Aktualitet

Gjyqtari i Gjykatës së Lartë dorëhiqet nga shqyrtimi i çështjes së Veliajt/ Ja kush caktohet relator

Gjyqtari i Gjykatës së Lartë, Ilir Panda ka dhënë dorëheqj...

Nga apartamenti i fshehur tek firma fiktive dhe vjedhja e 50 000 eurove/ Sokol Ngresi gjyqtari, që njeh vetëm skandale

19 Korrik 2021, 10:29, Vetingu CNA

Nga apartamenti i fshehur tek firma fiktive dhe vjedhja e 50 000 eurove/ Sokol

Gjyqtari i Gjykatës së Apelit të Vlorës Sokol Ngresi do të rikthehet sërish para Kolegjit të Posaçëm të Apelimit, për të dhënë llogari për pasurinë e fshehur dhe jo vetëm.

Me datë 26.07.2021, pra javës që vjen Ngresi, do të duhet të justifikojë pasurinë të cilën nuk e ka deklaruar.

Në seancën kaluar të datës 7 Korrik 2021, Ngresi tentoi të justifikohej se ankimi për të ishte kryer jashtë afatit ligjor.

Por, bazuar në nenin 450 të Kodit të Procedurës Civile, KPA e përbërë me kryesuese, Albana Shtyllën, relatore: Ina Ramën, dhe anëtarë: Natasha Mulaj, Rezarta Schuetz, Sokol Çomo, vendosi që lidhur me këtë kërkesë do të deklarohej në vendimin përfundimtar për çështjen.

Gjatë paraqitjes së shkaqeve të ankimit, Komisioneri Publik, Florjan Ballhysa, vlerësoi se subjekti i rivlerësimit ka kryer deklarim të pasaktë dhe të pamjaftueshëm të pasurisë dhe ka mungesë të burimeve të ligjshme të pasurisë. Komisioneri Publik kërkoi ndryshimin e vendimit nr. 324, datë 11.12.2020, të Komisionit të Pavarur të Kualifikimit, dhe shkarkimin nga detyra të subjektit të rivlerësimit Sokol Ngresi.

KPA reagon për pasurinë e padeklaruar

Lidhur me disa denoncime, ku pretendohet për një pasuri të padeklaruar nga ana e subjektit të rivlerësimit, Komisioneri Publik, Florjan Ballhysa rezervoi të drejtën të shprehet derisa subjekti i rivlerësimit të mbajë qëndrimin e tij dhe trupi gjykues të deklarohet nëse do t’i pranojë në cilësinë e provës këto denoncime.

Por gjyqtari Ngresi ka kundërshtuar shkaqet e ankimit të Komisionerit Publik dhe lidhur me denoncimet deklaroi se kontrata e pronësisë e pretenduar është e falsifikuar dhe e montuar.

Nga ana tjetër KPA ka pranuar në cilësinë e provës denoncimet në adresë të gjyqtarit Sokol Ngresi, me arsyetimin se kanë elemente mbi të cilat duhet hetuar.

KPA ka vendosur t’i kërkojë informacion përshkrues dhe akte shoqëruese shoqërisë A.Construction lidhur me kontratën nr. ***, datë 26.02.2014, mandatet e arkëtimit të pretenduara në denoncim si të nënshkruara prej subjektit të rivlerësimit, si dhe informacion mbi statusin aktual ligjor të pasurisë së përshkruar në kontratë, gjendjen fizike dhe pronësinë mbi të.

Të kërkojë informacione shtesë sqaruese nga Agjencia Shtetërore e Kadastrës Drejtoria Vendore Vlorë.

T’i kërkojë informacion ILDKPKI-së për mënyrën dhe praktikën e ndjekur nga ky institucion për vënien në dispozicion të modeleve të deklaratave periodike subjekteve deklarues, për periudhën 2007 deri 2010.

T’i kërkojë informacion shoqërisë *** shkp në lidhje me një kontratë noteriale lidhur ndërmjet kësaj kompanie dhe subjektit të rivlerësimit Sokol Ngresi, prishjen e saj dhe kthimin palëve ne gjendjen e mëparshme.

Si i shpëtoi KPK apartamenti i fshehur?

CAN.al ka siguruar në mënyrë ekskluzive një kontratë për blerjen e një apartamenti nga gjyqtari Ngresi, së bashku me mandatet që faktojnë kryerjen e pagesave për blerjen e tij.

Në fakt një gjë e tillë duhej të ishte zbuluar nga shkalla e parë e Vettingut, përkatësisht Komisioni i Pavarur i Kulifikimit, pasi pretendohet se kryejne hetime të mirëfillta dhe të detajuara.

Ose hetimet janë kryer dhe KPK e ka fshehur qëllimisht këtë kontratë.

Bëhet fjalë për apartament me sipërfaqe 113,43 m2, ndodhur në qytetin e Vlorës, të blerë nga gjyqtari Sokol Ngresi në vitin 2014, nga shoqëria “AFA Konstruksion” sh.p.k., në vlerën 68,000 euro

Sipas kontratës, rezulton se ky gjyqtar, në datën 26.02.2014 kur ka lidhur kontratën e porosisë ka paguar njërin këst prej 8,000 (tetëmijë) eurosh.

Nga mandatet e arkëtimit rezulton se janë kryer edhe pagesa të tjera, përkatësisht në vlerat 6,000 (gjashtë mijë) euro në dt. 27.05.2014 dhe 6,000 (gjashtë mijë) euro në dt. 29.09.2014.

Mandatet mbajnë firmën e vetë gjyqtarit, me nënshkrim origjinal, por pavarësisht kësaj, nuk janë deklaruar në asnjë moment nga ana e tij.

Tre skandalet

Emri i gjyqtarit Sokol Ngresi është i lidhur me tre skandale

I pari ka të bëjë me një firmën fiktive të hedhur nga gjyqtari Sokol Ngresi, në një vendim gjyqësor në emër të një gjyqtari tjetër që nuk ndodhej në Shqipëri, në çështjen civile me nr.683 vendimi, i datës 23.12.2005,

Për më tepër gjyqtari Ngresi fajin ia ka hedhur sekretares gjyqësore, e cila rezultonte punëtore mirëmbajtje në emërtesë.

Në relacion e Ministrisë së Drejtësisë, e cila kërkonte dhe shkarkimin e Ngresit, thuhej se dy gjyqtarët e tjerë, Gjinovefa Gaba dhe Sokol Ngresi, kanë firmosur fiktivisht për praninë e gjyqtarit relator.

I dyti ka të të bëjë me vendimin gjyqësorë të marrë nga gjyqtari i Apelit, Sokol Ngresi, i cili ka lënë të lirë biznesmenin Arben Gropa, allias Vangjel Zijaj, që shfrytëzoi rastin të arratisej.

Qëllimi i këtij arrestimi ishte bërë me qëllim ekstradimin e tij drejt Italisë, ndërkohë pas disa ditësh Gjykata e Apelit Vlorë nëpërmjet Sokol Ngresit, ka vendosur të lirojë Arben Gropën. Gjatë kësaj kohe ndaj Gropës, po zhvillohej një proces gjyqësor në Fier, për miratimin ose jo të kërkesës së autoriteteve italiane për ekstradimin e Gropës.

CNA.al mëson se inspektimi ka përfunduar me procedim disiplinor ndaj gjyqtarit Sokol Ngresi.

Skandali i tretë ka të bëjë me 50 000 euro, për të cilat Ngresi ka çuar në burg dadon e shtëpisë me pretendimin se ia ka vjedhur ajo.

Nga burime të saj CNA.al mëson se Ngresi, përveçse e ka akuzuar punonjësen e shtëpisë, ai dyshohet se e shfrytëzonte edhe në të zezë.

Skandali përforcohet më shumë pasi nuk dihet burimi i 50 000 erove që gjyqtari mbante në shtëpi dhe se përse nuk i kishte deklaruar në institucionet bankare.

Tashmë me apartamentin e ffshehur radhiten katër skandale që lidhen me emrin e gjyqtarit Sokol Ngresi./CNA.al