Vrau gruan në mënyrë barbare/ Detajet që fundosen pilotin grek, mesazhet që u zbuluan

18 Qershor 2021, 11:54, Aktualitet CNA

Piloti 32-vjeçar Charalambos Anagnostopoulos është arrestuar nga policia greke pasi ka pranuar vrasjen e gruas së tij, 20-vjeçares britanike Caroline. Mediat greke raportojnë se piloti ka rrëfyer vrasjen brutale.

Pas më shumë se tetë orësh pyetje, ai rrëfeu se kishte vrarë gruan. Informacioni në dispozicion të policisë ishte i tillë që nuk mund ta përgënjeshtronte.

Sipas Protothemas, piloti 32-vjeçar pretendon se gruaja e tij kishte vendosur të merrte fëmijën dhe ta linte.

Protothema shkruan se Babis u dorëzua dhe tregoi gjithçka kur në ishullin ku po qëndronte, Alonissos, shkoi një helikopter i policisë greke. Deri në atë moment, ai ishte i sigurt se kishte kryer krimin perfekt, por teksa policët i afroheshin kuptoi se po i vinte fundi sajesës që kishte organizuar për 37 ditë, e ku vetes i kishte lënë rolin e protagonistit.

Piloti 32-vjeçar ka rrëfyer marrëdhënien e dashurisë me Caroline, e cila përfundoi me grindje të përditshme, me frikën se ajo do ta linte dhe se do t?i merrte fëmijën.

Po ashtu mediat greke, shkruajnë se nga të dhënat që policia ka në dispozicion nga celulari i Carolinës, mendohet se në natën që u vra ajo ishte në një grindje me burrin e saj. Nga mesazhet e dërguara që dolën për mediat ishte përdorur edhe fjala ?budalla?.

Natën që ka ndodhur krimi, 32-vjeçari pretendon se ka humbur kontrollin pasi Caroline ka vënë fëmijën në krevat dhe i ka thënë që të largohej, duke i kërkuar divorcin. Ai përshkroi çdo gjë në detaje, se si i mbylli gojën dhe i vuri jastëkun sipër derisa i mori frymën. Fillimisht, asaj i kanë rënë ndjenjat dhe më pas ka humbur jetën. E për të përforcuar idenë e një grabitjeje, Babis ka shkuar tek qeni dhe me duart e tij e ka mbytur.

Pas kësaj shkoi dhe theu kartën e memories së kamerave të sigurisë dhe e hodhi në tualet. Më vonë bëri një rrëmujë në shtëpi për të dhënë idenë e një grabitje dhe tregoi se si lidhi veten.

Ngjarja e rëndë ka shokuar opinionin publik. Policia arriti të zbulojë se 32-vjeçari është vrasësi i Caroline. Provat u bazuan kryesisht nga analiza me ndihmën e teknologjisë e të dhënave të celularëve të çiftit dhe ora biometrike e viktimës.

Media greke ka ndërtuar gjithë kronologjinë e vrasjes së Caroline Crouch.

Në orën 00:35, kamera e dhomës së ndenjes shkrep për herë të fundit. Piloti grek është ulur në divan me foshnjen 11-muajshe dhe shtyp me nervozizëm celularin. Ai po shkëmbente mesazhe me bashkëshorten dhe dukej i tensionuar. Ai e kishte marrë foshnjen në papafingo.

Në 1:20, 32-vjeçari heq kartën e kujtesës nga kamera dhe pamja bëhet e zezë. Duket se ky ka qenë momenti kur piloti grek ka vendosur të vrasë bashkëshorten.

Për 2 orë e 40 minuta burrë e grua shkëmbyen mesazhe të forta dhe kërcënuese në celular.

Më pas në orën 04:01, ora biometrike e vajzës tregon për një stimulim intensiv në puls.

Në orën 04:11 pulsi i Caroline Crouch pushoi së rrahuri dhe ndërroi jetë. Një nga arsyet pse u zbulua vrasësi ishte se ai kishte dhënë orë tjetër për ngjarjen duke pretenduar se e gjitha kishte ndodhur rreth orës 5-6.

Policia zbuloi se oraret nuk përputheshin me provat e gjetura.