“Kush nuk njeh zgjedhjet është kundër demokracisë”/ Manjani “shuplakë” opozitës

6 Qershor 2021, 11:20, Politikë CNA

Ish-ministri i Drejtësisë Ylli Manjani ka folur për zgjedhjet dhe të mirat që ato sjellin. Manjani është shprehur se zgjedhjet janë zgjidhje për vendin. Ai thekson se ato janë thelbi i demokracisë dhe kush është kundër tyre është kundër demokracisë.

Në një postim në rrjetet sociale Manjani gjithashtu shprehet se zgjedhjet mund të largojnë të këqiat e politikës që ne njohim.

Deklarata e Manjanit është një “shuplakë” për opozitën, pasi deri tani komponentë të PD dhe LSI kanë deklaruar se nuk i njohin zgjedhjet e 25 prillit dhe rezultatin e dalë prej tyre.

?Zgjedhjet e shpeshta janë zgjidhja. Asgjë më të shëndetshme se zgjedhjet nuk di që të mund të largojë të gjitha të këqijat e politikës që njohim.

Me ZGJEDHJE të shpeshta, largohen stabilokratët që sundojnë deri sa vdesin.

Më ZGJEDHJE të shpeshta bie oferta financiare e blerjes së votave për pushtet. Nuk ka më para për një pushtet që bie pas 1 viti. Ska më llogjikë.

Me ZGJEDHJE zgjidhen të gjitha krizat e politikës. Politika nuk ka më të drejtë të gjykojë kundërshtarët, sepse ata i gjykon vota.

Me ZGJEDHJE të shpeshta qeveritë detyrohen të qeverisin. Ata nuk sundojnë dot më sepse bien…

Me ZGJEDHJE të shpeshta bien kokat e politikanëve dhe u hapet rruga të tjerëve.

Gara e sjell zhvillimin, por duhen ZGJEDHJET ku ajo të ndodhë.

Zgjedhje sa më shpesh!

Vetëm zgjedhjet e shpëtojnë shtetin nga presioni i përhershëm politik.

ZGJEDHJET e shpeshta çlirojnë shqiptarin nga kontrolli i përhershëm politik. Shqiptari jo politik dhe i lirë bën çudira.

Për fat të keq ka ende shumë analistë që rrudhin turinjtë kur jua plas në sy këtë zgjidhje, por është e vetmja.

ZGJEDHJET janë thelbi i demokracisë. Kush është kundër ZGJEDHJEVE, është kundër demokracisë.

Populli vendos vetë, jo me politiqenër! Aq më pak me ambasadorë dhe teori importi mbi demokracinë, politikën e shtetin.

Shqipëria ndryshon vetëm me zgjedhje.

Me stabilokratë vetëm përkeqësohet.

Kushdo shembuj suksesi të kësaj që po them, të hedhë sytë nga Italia, Greqia, Franca e madje edhe nga Kosova. Shihni atje se si bien kokat një e nga një. Sepse atje ka ZGJEDHJE?, ka shkruar Manjani./ CNA.al