web counter
LEXO PA REKLAMA!

SHKARKO APP

App Store
Google Play

E fundit!

x

Kur vërtet FAJIN E KA SALIU

6 Maj 2021, 12:43, Politikë CNA

Elvi FUNDO

Lulzim Basha prej 10 ditësh po sillet vërdallë në tregun politik për të tentuar që të mbajë lart frymën se zgjedhjet ja vodhën.

Ai nuk humbi dhe ende nuk ka bërë të paktën një akt qytetar si një politikan europian ashtu si kundër pretendon, pra dhënien e dorëheqjes dhe marrjen e përgjegjësive për një humbje katastrofike në zgjedhjet e 25 Prillit.

Është gjetur një mënyrë tjetër, pra kërkohet të justifikohet fakti se votat janë vjedhur dhe votat janë blerë megjithëse diferenca e PS me PD është gati 140 mijë vota. Nga ana tjetër nëse mbledhim të majtën, socialistët dhe LSI-në si një parti ekstreme të majtë janë gati 250 mijë vota para e majta me të djathtën.

Në një analizë të thjeshtë të shifrave në Korçë diferenca është gati 10 mijë vota dhe e majta në total është 20 mijë përpara. Dhe në qarqet e tjera si Elbasani, Fieri , Durrësi apo Tirana e shohim që diferencat janë 30 , 40 apo 50 mijë vota.

Pra nuk bëhet fjalë për vjedhje apo blerje votash. Vjedhje jo, e jo për faktin se PD ka pasur komisionerë në qendrat e votimin numërues, votues dhe nuk ka pasur asnjë kontestim , asnjë procesverbal të ankimuar, asnjë kuti të kontestuar e të tjera si këto. Por, sot jemi përballë një fakti ka ardhur koha për të bërtitur që për herë të parë vërtet në këtë situatë që ndodhet Partia Demokratike fajin e ka Saliu. Po, po fajin e ka Saliu! Edhe pse po hesht duke mbështetur Lulzim Bashën ashtu siç bëri në vitin 2017. Atëherë e justifikoi Lulin duke thënë se fajin e kishin këshilltarët mizerabël. Sot në 2021 nuk e ka thënë këtë , ende nuk i ka sulmuar izraelitët, por po tenton të na tregojë nëpërmjet qytetarit dixhital se votat janë blerë dhe janë vjedhur.

Po sytë ku i kishte Luli, për çfarë është atje në krye të PD-së?

Është Sali Berisha që e ka sjellë Lulzim Bashën në 2013 në krye të Partisë Demokratike, është Sali Berisha që e mbajti në vitin 2017, është Sali Berisha që bëri sehir kur PD-ja u nda, kur iku Astrit Patozi apo kur u hoq Jozefina Topalli, kur u hoq Imami, Bode , Edith Harxhi, Edvin Kulluri, Arben Ristani e gjithë të tjerët me rradhë deri tek ata që Luli ka pasur bashkëpuntor dhe i merrte i hidhte sipas dëshirës sepse kishte mburojën e Sali Berishës.

Po, po është Sali Berisha që e mbron sot Lulzim Bashën duke i ndenjur te gardhi i PD-së duke mos lejuar demokratët të hyjnë brenda. Ata që rrijnë në oborr bërtasin se e kanë amanet nga Saliu. Po vërtet fajin e ka Saliu duke folur dhe duke mos folur. Herën e parë duke na thënë në 2017 se fajin e kishin këshilltarët mizerabël apo në 2013 kur bëri zgjedhjen e tij të gabuar të cilën sot nuk do ta pranojë pas 8 vitesh.

Pas një humbje katastrofike, pas një rrudhje të së djathtës në rreth 600 mijë vota bashkë me aleatët edhe disa të majtë brenda. Rrudhje që ka gati 60 mijë vota më pak se në vitin 2013 kur PD dilte në opozitë pas 8 vitesh pushtet.

Sot pas 8 vitesh pushtet të socialistëve nuk merr dot rezultatin e 2013 Lulzim Basha dhe Saliu nuk flet, Saliu e mbron. Nuk mundet më që Sali Berisha të rrijë dhe të mos flasë dhe të shikojë se si Lulzim Basha shkatërron PD-në pasi ajo nuk është prona as e Lulit as e kunatit as e vjehrrit, por as dhe prona personale e Sali Berishës.

Sali Berisha ka një meritë të madhe , ishte lideri historik i asaj partie, udhëhoqi shumë reforma e mbajti për gati 13 vite në pushtet megjithëse në shumë raste mund të ishte dhe pakicë, por sot atë pasuri kombëtare që quhet Partia Demokratike nuk mund ta përdorë si plaçkë lufte për pazare me Edi Ramën për të mbajtur kokën e Lulzim Bashës në krye të PD-së.

Dhe të gjithë kanë një problem kush e mban Lulin? Pse rri Luli te PD-ja? Pse nuk ikën Luli? Ka një të vërtetë të madhe. Sot Lulzim Bashën po e mban dhe po e mbron Saliu, po, fajin e ka Saliu. Ai po mban në krye të PD-së Lulzim Bashën një humbës serial një njeri të dështuar, ortakun e Edi Ramës, njeriun që nuk mundi ta rrëzonte kryeministrin e skandaleve e bëmave dhe gjëmave të 8 viteve të fundit, por i garantoj një mandate tjetër 4 vjeçar. Dhe kështu siç po sillet i garanton atij edhe mandatin e vitit 2025. E pra, sot fajin e ka Saliu që Lulzim Basha është në krye të PD-së.

Fajin e ka Saliu që nuk flet për të thënë publikisht Basha ik , jep dorëheqjen dhe PD-ja të futet në një proces demokratizimi të plotë bashkimi. Një proces ku për herë të parë të ketë zgjedhje dhe alternativa të gjithëpranuara nga palët.

Pra kushdo garon, garon i lirë, anëtarësia voton e lirë dhe PD del më e fortë dhe më e bashkuar. Atëherë do të ketë një PD të vërtetë që do të përmbysë Edi Ramën.

Në rast se Saliu nuk do të flasë, fajin e ka Saliu, në rast se Saliu do të mbajë Lulzim Bashën sërish e ka fajin Saliu, në rast se Saliu nuk do të veprojë dhe të bashkohet me ata që duhet të rrëzojnë Lulzim Bashën që janë shumica e demokratëve vërtet fajin e ka Saliu. Dhe nga ana tjetër edhe ata që dalin sot publikisht dhe i kërkojnë Lulzim Bashës të japë dorëheqjen duhet të bërtasin me zërin lart, sot fajin e ka Saliu.

E pranuan ta zgjidhte Lulzim Bashën, e pranuan ta mbante Lulzim Bashën por nuk mund të pranojnë më kurrë që Lulzim Basha t?ju japë mbi supe edhe 8 vite të tjera Edi Ramën sepse fajin e ka Saliu që do të mbajë Lulzim Bashën dhe këtë nuk e thotë askush. Pra sot jemi në një përballje të vërtetë, Lulzim Basha është aty se do Saliu dhe fajin për këtë e ka po, Saliu./Elvi FUNDO – CNA.al





Lajmet e fundit nga