“Jemi faktori i ndryshimit”/ Evald Serreqi: Do pensionojmë lidershipin e politikës së vjetër

15 Prill 2021, 18:08, Politikë CNA

Bashkëthemeluesi i Lëvizjes për Ndryshim dhe kandidati për deputet në qarkun e Elbasanit, Evald Serreqi, ka folur për fushatën elektorale, kur kanë mbetur vetëm pak ditë nga zgjedhjet parlamentare.

Serreqi tregoi se Lëvizja për Ndryshim është themeluar nga të rinj që janë të gatshëm të marrin angazhim qytetar me misionin e shenjtë të mbylljes së një tranzicioni të tejzgjatur në Shqipëri

?Lëvizja për Ndryshim u krijua si një bashkim idesh e aspiratash të një grupi të rinjsh, të mirëarsimuar, të realizuar në jetën e tyre profesionale e private, të pavarur nga politika e sotshme, të cilët janë të gatshëm të marrin angazhim qytetar me misionin e shenjtë të mbylljes së një tranzicioni të tejzgjatur në Shqipëri, e hapjen e një kapitulli të ri politikëbërjeje në vend?, u shpreh ai për CNA.al

Kandidati për deputet është zotuar që të mbrojë interesin e qytetarëve dhe të jetë mbështetës i Reformës në Drejtësi.

?Si kandidat i Lëvizjes për Ndryshim në qarkun e Elbasanit, i zotohem votuesit tim se nesër në Parlamentin shqiptar do të jem vazhdimisht në mbrojtje të interesit publik e jo atij privat apo familjar. Si banues i përhershëm i këtij qyteti do jem vazhdimisht për 4 vitet e ardhshme në kontakt të vazhdueshëm me qytetarët e mi si dhe i siguroj që pushtetin e mandatuar prejt tyre do ta vë në dispozicion të çdo reforme që sjell një klimë tjetër ekonomike e sociale në vend. Do të jem mbështetës i vendosur i përfundimit sa më të shpejtë i Reformës në Drejtësi, duke siguruar një sistem të pavarur drejtësie si hapi i parë i funksionimit të shtetit. Ndryshimi fillon ditën kur Politika i mban duart larg nga Drejtësia!?, vijoi ai më tej.

Bashkëthemeluesi i Lëvizjes për Ndryshim deklaroi në një prononcim për CNA.al se ata synojnë të marrin aq mandate sa do të pamundësonim ?kapjen e timonit?, duke u bërë faktor i ndryshimit.

Serreqi pretendon se ata do të pensionojmë një herë e mirë Lidershipin e politikës së vjetër në Shqipëri.

?Ne do arrijmë të marrim aq mandate sa do të pamundësonim ?kapjen e timonit? nga një person i vetëm. Duke u bërë kështu direkt faktor i ndryshimit. Një prej zotimeve tona politike është që pasi të jemi faktor i krijimit të një shumice parlamentare, do të pensionojmë një herë e mirë lidershipin e politikës së vjetër në Shqipëri. Ne nuk kemi një emër për Kryeministër, por kemi kritere të panegociueshme për cilindo që e pretendon një post të tillë. Kryeministri i ardhshëm i vendit tonë do jetë një njeri i pakorruptuar! Vetëm një person i tillë është i gatshëm të krijojë një ekip model, patriot, për të përballuar gjëndjen e vështirë në të cilin ndodhet vendi e për të ndërmarrë një sërë reformash të domosdoshme për të dalë nga kriza, e për të siguruar një nivel më të lartë demokracie në Shqipëri!?, theksoi kandidati i LN-së./ CNA.al