Të inkriminuarit kandidatë për deputetë/ Duka: Presim hetimin e prokurorisë për emrat që ka çuar KQZ

23 Mars 2021, 17:08, Politikë CNA

Zgjedhjet parlamentare të 25 prillit do të jenë jo vetëm një beteje e qeverisë aktuale për të marrë manditin e tretë, por edhe një ?luftë? e opozitës për të ardhur në qeveri.

Partia Demokratike do të hyjë së bashku me aleatët e saj tradicionalë, me të cilët ranë dakord për vende të sigurta në listë. Kreu i Partisë Agrare Ambientaliste Agron Duka është renditur i dyti në Durrës në koalicionin Aleanca për Ndryshim-PD.

Duka duke komentuar për situatën që paraqitet në terren, foli edhe për deklaratat e ambasadores amerikane Yuri Kim, e cila ka kërkuar nga partitë politike lista me kandidatë të pastër dhe të painkriminuar.

Në një reagim për CNA.al, Duka u shpreh se përfshirja e personazheve të inkriminuar është një problem sa serioz aq edhe aktual, duke theksuar se po mirëpret thellimin e hetimeve të kandidatëve që KQZ ka dërguar në prokurori.

Sipas kreut të PAA-së, lista e opozitës do të jetë konform ligjit dhe e hapur ndaj çdo vendimi që merret nga institucionet ligjzbatuese.

?Me afrimin e zgjedhjeve kemi parë një intensifikim të këtyre mesazheve nga ndërkombëtarët, natyrisht shumë të mirëpritura nga ne si opozitë dhe nga qytetarët shqiptarë, pasi është koha të kemi përfaqësim dinjitoz në Parlament dhe të neutralizojmë përfshirjen e krimit në zgjedhje. Kriminalizimi i politikës dhe institucioneve, nëpërmjet kandidimit të drejtpërdrejtë të elementëve me rekorde kriminale apo përfshirja e tyre në fushatat zgjedhore, si në rastet e dosjeve 184 dhe 339, kanë qenë në qendër të krizave politike që kemi kaluar këto vite.

Prandaj kërkesat e ambasadorëve janë në linjë me atë që ka qenë beteja e opozitës për zgjedhje të lira dhe të ndershme dhe dekriminalizimin e politikës. Për sa i përket kandidatëve për të cilët KQZ kërkon verifikim, mirëpres thellimin e këtij hetimi dhe jam i bindur që listat e opozitës do të jenë konform ligjit, pasi do të jemi të hapur ndaj vendimi që do të merret nga institucionet në bazë të të dhënave që ato kanë në dispozicion?, tha Duka për CNA.al.

Më tej kreu i PAA komentoi edhe regjistrimin e Tom Doshit në zgjedhjet e 25 prillit, ndonëse ky i fundit u kundërshtuar nga Kim për të qenë pjesë e Parlamentit të ardhshëm.

?Kjo është një temë mjaft kontroverse, pasi jemi përballë dy qasjesh, asaj politike dhe asaj ligjore. Për sa i përket qasjes politike, që është ajo që mban ambasada, bazuar mbi qëndrimin e Departamentit të Shtetit, regjistrimi nuk do të duhet të kishte ndodhur.

Ndërsa për pjesën ligjore, kemi një vakum, pasi z. Doshi nuk rezulton i dënuar në Shqipëri dhe kësodore nuk ka asnjë pengesë formale. Në raste të tilla, kur përfaqësuesit e shteteve aleate kanë kërkesa kaq specifike, do të ishte e udhës që të kishte paraprakisht një shkëmbim imformacionesh, që qëndrime të tilla të kenë një produkt dhe mos të kthehen në debate politike që nuk japin një produkt final?, u shpreh Duka për CNA.al.