Zgjedhjet e 25 prillit/ Dashamir Shehi zbulon sa mandate synon PD në Tiranë

22 Mars 2021, 16:42, Politikë CNA

Ambasadorja e SHBA Yuri Kim ka kërkuar nga partitë politike që në zgjedhjet e 25 prillit listat e kandidatëve të mos i kapë ligji i dekriminalizimit, duke paralajmëruar dhe skualifikimin e emrave të prekur.

Ndërkohë, ditën e sotme KQZ ka dërguar në prokurori për hetim emrat e 12 kandidatëve nga listat e PS, PD, LSI dhe PSD.

Kreu i LZHK Dashamir Shehi në një intervistë për CNA.al u shpreh se qytetarët meritojnë të kenë përballë njerëz të pastër dhe të papërfshirë në ngjarje kriminale.

Sipas tij të inkriminuarit ndalohen me ligj për të kandiduar, duke shtuar se PD nuk ka asnjë emër të inkriminuar në listat e saj. Ndërkohë që Agron Kapllanaj, Gentjan Muça, Rezart Tusha, Zef Hila janë dërguar për hetim në prokurori.

Kreu i LZHK shtoi më tej se koalicioni Aleanca për Ndryshim- PD synon të marrë në Tiranë nga 17 deri në 20 mandate deputeti.

?Duhet të mos ketë asnjë të dekriminalizuar nëpër lista, ato lista janë verifikuar, sma ha mendja që ka njerëz nëpër lista të krimit sepse nuk i lejon ligji, unë nuk marr përsiper emrat që vetë komisioni nuk i ndaloi, kush ka dokumenta të paligjshme le t’i ndalojë ligji. Lista e PD nuk ka të dekriminalizuar. Nëse kanë dalë emrat duhet të largohen, si detyrë e ka komisioni.

Mandatet e PD 17 deri në 20 mandate në Tiranë, vetëm pjesa e PD nuk e di se sa mund të dalë LSI, edhe pse dhe ata janë në opozitë.

Banorët duan të largohet sa më parë, një ditë e me parë Edi Rama, kjo është bindja popullore, mbas 8 vjetëve kjo është dëshira e qytetarëve, duhet parë a puthet me realitetin?, tha Shehi për CNA.al.

Kreu i LZHK komentoi më tej dhe incidentin e ndodhur mes militantëve të PS dhe PD në Elbasan në 14 mars, ku akuzoi qeverinë aktuale si përgjegjëse për ushtrimin e dhunës dhe nxitjen e konfliktit.

?Ngjarja e përplasjes së militantëve të PD është e organizuar nga PS, militantët e PD bënin thirrje politike, ndërsa të PS ishte thirrje rrugaçësh. Plus ishin 5-6 fytyra nga ata me pistoletë, ku dhe PD i tregoi shumë mirë. Çfarë bënin ata përreth Kryeministrit,kur atë e mbron Garda e Shtetit? Këtë e tregon që e ka organizuar PS, dhe duket që dhe bota e krimit është grumbulluar pergjatë pushtetit. Ata nuk janë eleminuar nga shteti sepse kanë mbështetjen e Partisë Socialiste?, tha Shehi për CNA.al.