Haradinaj Vuçiçit: Njihe pavarësinë e Kosovës ose do bashkohemi me Shqipërinë

7 Shkurt 2021, 16:06, Kosova & Bota CNA

Bashkimi kombëtar me Shqipërinë është përmendur shpesh në fushatën zgjedhore në Kosovë. Ramush Haradinaj, kryetar i Aleancës për Ardhmërinë e Kosovës, i ka dërguar një mesazh Presidentit të Serbisë, Aleksandar Vuçiç, duke i kërkuar atij ta njohë pavarësinë e Kosovës.

Haradinaj ka deklaruar se nëse Vuçiç nuk e bën këtë gjë, atëherë do të vijë ?bashkimi me Shqipërinë?. Deklarata është bërë gjatë aktivitetit të fundit zgjedhor të mbajtur nga AAK-ja këtë fundjavë.

?Jua kërkoj votën për një program që e ngjall ekonominë, për njerëz që i keni këtu, ndër ta 13 doktorë shkencash, ekonomistë, juristë, arkitektë, inxhinierë… Jua kërkoj votën edhe për postin e Presidentit që po do të kryejë punët e Kosovës, planin ndërkombëtar, edhe me Serbinë në mënyrë që çdo qytetar i këtij vendi të jetë krenar,? ? u shpreh Haradinaj.

AAK ka si moto kryesore ?Haradinaj për President? gjatë kësaj fushate zgjedhore duke deklaruar hapur se ajo synon të nxjerrë pas zgjedhjeve parlamentare të 14 shkurtit një situatë të re politike ku posti i Presidentit, i lënë pas dorëheqjes së Hashim Thaçit, t?i shkojë kryetarit të AAK-së.

?Kur të bëhem President […] i bëj të fala Vuçiçit, bëhu gati o të njohësh Kosovën… mos na vono më, se s?kemi nge të presim, sepse që kur kemi organizuar ushtri të re dhe pavarësim juridik, ne i ngehemi rrugës sonë, bashkimit me Shqipërinë, nuk ke nga t?ia mbash, ose do ta njohësh [Kosovën],? ? u shpreh Haradinaj.

Më 17 shkurt Kosova bën trembëdhjetë vite nga shpallja e pavarësisë nga Serbia, e cila pas shpërbërjes së Jugosllavisë, deri në vitin 1999, e njihte vetëm si zonë nën autoritetin e saj me status të autonomisë.

Konflikti ushtarak që la mijëra të vrarë dhe të zhdukur, detyroi Aleancën e Atlantikut të Veriut (NATO) dhe Kombet e Bashkuara të ndërhynin ushtarakisht duke mbështetur ngritjen e një shteti të ri me bazë multi-etnike, shtet që u mëvetësua më 17 shkurt 2008. Mirëpo Serbia nuk e ka pranuar në asnjë moment këtë pavarësi, përkundrazi ka lobuar që sa më shumë shtete të mos e njohin dhe ta kundërshtojnë anëtarësimin e saj në organizatat ndërkombëtare

Ky lobim kundër Kosovës, u bë shkas që qeveria e drejtuar nga Ramush Haradinaj të vendoste tre vite më parë taksa 100% ndaj mallrave serbe. Taksa përshkallëzoi marrëdhëniet duke ndërprerë përfundimisht procesin e dialogut, i nisur prej rreth 10 vitesh me ndërmjetësime kryesisht nga Brukseli./euronews