ZYRTARE/ Arrihet marrëveshja, Kosova dhe Shqipëria me ligë të përbashkët në basketboll

10 Shtator 2020, 17:55, Sport CNA

Është zyrtarizuar marrëveshja historike mes Federatës së Basketbollit të Kosovës dhe Federatës së Basketbollit të Shqipërisë. Duke filluar nga sot këto 2 shtete do të kenë një ligë të përbashkët në basketboll.

Pas shumë negociatave, sot, në Tiranë, është nënshkruar marrëveshja për unifikimin e ligave. Kampionati do të quhet ?Liga Unike? dhe në të do marrin pjesë 8 skuadra (4 ekipet më të mira nga secili shtet).

Po ashtu, edhe bordi sot përbëhej nga 2 anëtarë të Bordeve të FSHB-së dhe FBK-së, si dhe nga 2 sekretarë të përgjithshëm të të dyja federatave. Të pranishëm në mbledhje ishin edhe kryeministri i Shqipërisë, Edi Rama, si dhe presidenti i FIBA Europe, Turgai Demirel.

Kështu atë që nuk e bëri politika, arrin ta bëjë sporti, që ?fshin? kufijtë mes dy vendeve, ndërsa basketbolli ?djeg? sportet e tjera dhe bëhet i pari që bashkon dy vendet.

I pranishëm në këtë ceremoni të veçantë është edhe Edi Rama, kryeministri i Shqipërisë, i cili ka deklaruar mes të tjerash: ?Është një vendim i rëndësishëm jo vetëm që federatat e basketbollit kanë vendosur të krijojnë një Ligë unike. Paralelisht me kampionatet do të bëjnë një aktivitet sistematik që do të përfshije dy anët e kufirit.

Kjo nismë hap një rrugë të re, krijon një model dhe me siguri do të bëhet shtysë për të tjerët që ta ndjekin. E përforcoj mendimin e dhënë këtu nga të dyja ministret. Ne jemi më shumë se mbështetës. Ne e duartrokasim këtë nismë. Kjo është pak si veza e Kolombit, që kur e shoh të ndodhë thua pse nuk ka ndodhur më parë, ose pse ka ndodhur vetëm kjo.

Është dashur një periudhë pjekurie e këtyre ideve dhe dëshirave që kanë ekzistuar prej kohësh. E mbaj mend personalisht. Idetë kanë nevojë për kohën e tyre. Fakti që i erdhi koha është shumë i gëzueshëm. Shumëçka duket sot e vonuar, por deri para më shuam se 10 viteve dukej fantashkencë.

Krijimi i Ligës Unike i çon gjërat në nivel tjetër në organizimin e aktiviteteve të përbashkëta. Kam shpresë dhe besim që kjo do të bëhet shtysë edhe për të tjerët. Aq për më tepër, në sport jemi të mëdhenj të jemi bashkë. Veç jemi shumë të vegjël.