Ilir Daja gjen sulmuesin e munguar te Partizani

27 Gusht 2020, 11:26, Sport CNA

Partizani ka zhvilluar dje ndeshjen e tretë miqësore në kuadrin e përgatitjeve që ekipi po kryen për fillimin e sezonit të ri. Të kuqtë e drejtuar nga trajneri Ilir Daja kanë marrë fitoren e parë në këtë periudhë, sukses i cili ka ardhur dje në përballjen me Partizanin B, që në edicionin e ri do të militojë në Kategorinë e Parë. Testi brenda familjes është zhvilluar gjatë pasdites së djeshme në stadiumin e Ohrit dhe është mbyllur në shifrat 2-0 në favor të skuadrës së parë.

Për të plotësuar axhendën e përgatitjeve të skuadrës së parë, Partizani B i drejtuar nga trajneri Dritan Mehmeti ka udhëtuar gjatë paradites së djeshme drejt Ohrit, ku të kuqtë e Superiores po zhvillojnë fazën intensive përgatitore. Ashtu si në dy testet e shkuara, edhe dje trajneri Daja ka vijuar me provat, ku i diktuar nga merkatoja e bllokuar, ai duhet të improvizojë disa lojtarë në role të reja. Risia në testin e djeshëm ka qenë aktivizimi i Jasir Asanit, i cili i është bashkuar ekipit me fillimin e përgatitjeve në Ohër. Ajo që ka rënë në sy gjatë kësaj periudhe, është ?blindimi? i Solomonit në majë të sulmit, pasi trajneri ka besim në ?rilindjen? e nigerianit.

Ky takim u ka vlejtur të dy trajnerëve, më shumë Ilir Dajës, pasi ai njëkohësisht ka vëzhguar nga afër edhe Partizanin B, nga ku e ka të lejuar të marrë lojtarë edhe në rast se merkatoja mbetet e bllokuar. Pjesa e parë ka qenë e ekuilibruar, ndonëse ekipi B ka qenë më kërkues, u mbyll në shifrat 0-0. Në pjesën e dytë të dy trajnerët kanë aktivizuar edhe lojtarët e tjerë që kanë pasur në dispozicion dhe këtu ka ardhur edhe ndryshimi pozitiv te skuadra e parë.

Takimi është zhbllokuar nga Çinari në minutën e 65-të. Me mbetjen në fuqi të dënimit të FIFA-s, i bie që shkodrani të jetë në dispozicion të trajnerit Daja në muajin dhjetor, pasi është pezulluar me katër muaj. Në minutën e 70-të skuadra e Dajës ka dyfishuar rezultatin dhe në ndihmë u ka ardhur autogoli i mbrojtësit Peqini. Në shifrat 2-0 u mbyll i gjithë testi, ku ndonëse ekipi i parë fitoi, trajnerit Daja i duhet akoma shumë punë për të injektuar filozofinë e tij te ?demat e kuq?, aq më shumë që priten edhe përforcime në merkato, që vijon të jetë e bllokuar.