E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Testimet edhe në spitale private/ Dasho: Ministria të marrë masa urgjente, po e kthejnë në biznes

20 Gusht 2020, 08:36, Politikë CNA

Eksperti i Shëndetit Publik Erion Dasho, ka publikuar një deklaratë të bërë një muaj më parë lidhur me situatën shëndetësore në vend, të krijuar nga koronavirusi.

Dasho deklaron ky qëndrim është aktual në kushtet e sotme, kur ofrimi i testimit për COVID nga sektori privat ka potencialin të shndërrohet në një “patate të nxehtë” dhe po etiketohet nga shumë analistë edhe si një “biznes me shëndetin e qytetarëve”.

Eksperti kërkon të bëhet transparencë dhe të merren masa rregullatore urgjente.

?Në kushtet kur spitale private, klinika dhe laboratorë do të nisin të ofrojnë këtë shërbim, lind nevoja për disa masa rregullatore urgjente:

1. Në mënyrë ideale, shërbimi që ofrohet nga sektori privat duhet paguar nga pare publike, pra shteti të rimbursojë 100% çmimin e testit. Kjo është në përputhje edhe me ligjin e sëmundjeve infektive.

2. Ofruesit e shërbimit të testimit (qoftë të testit të tamponit, qoftë të testit serologjik) duhet të bëjnë publik informacionin teknik dhe financiar lidhur me testet e përdorur. Minimalisht duhet të deklarojnë çmimin, prodhuesin, vendin e prodhimit, vende të tjera europiane ku përdoret ky test dhe parametrat bazë (sensitivitetin dhe specificitetin).

3. Si në rastin kur është shteti që paguan, ashtu edhe në rastin kur qytetarët paguajnë privatisht, çmimi i ofrimit të testit duhet të rregullohet. Një nga mënyrat është çmimi tavan, por kjo ka anën negative se mund të nxitë ofruesit të blejnë teste me cilësi të ulët. Mënyra më e drejtë do të ishte vendosja e një marzhi fiks bazuar mbi çmimin e blerjes?, shkruan ai në rrjetet sociale.

Dasho deklaron se nevoja e testimit do të përkthehet në një biznes, ndaj kërkon që ministria e Shëndetësisë të rregullojë sektorin dhe të mos lejojë që qytetarët të bien pre e shërbimeve me cilësi të ulët dhe çmime të kripura.

?Sot vlerësohet se ka një nevojë testimi të papërmbushur prej disa qindra teste në ditë. Kjo përkthehet në një biznes të garantuar që luhatet nga 1 deri 2 milionë dollarë në muaj! Volume të tilla tërheqin jo vetëm ofruesit e ndershëm të shërbimeve shëndetësore private, por edhe spekulantët e mundshëm që nuk mungojnë në këto raste!

Është përgjegjësia e ministrisë së shëndetësisë të rregullojë urgjentisht këtë sektor jetik në funksion të mbrojtjes së jetës dhe shëndetit të qytetarëve dhe moslejimit që ata të bëhen pre e shërbimeve me cilësi të ulët dhe çmime të kripura!?, nënvizon ai./ CNA.al