web counter
LEXO PA REKLAMA!

SHKARKO APP

App Store
Google Play

Protesta dhe pasiguri në Bjellorusi/ Udhëheqësja e opozitës largohet nga vendi

11 Gusht 2020, 09:14, Kosova & Bota CNA

Pas fitores së Lukashenkos, kontestimit të rezultatit dhe fillimit të protestave, udhëheqësja e opozitës në Bjellorusi, Svetlana Tikhanovskaya, është larguar nga vendi dhe është e sigurt në Lituani. Lajmin e jep, ministri i Jashtëm lituanez Linas Linkevicius përmes një postimi në Twitter të martën. Më herët gjatë së hënës ai kishte shfaqur shqetësime për sigurinë e saj, duke qenë se për disa orë nuk u ishte përgjigjur thirrjeve ndërsa stafi i saj nuk kishte informacione për vendndodhjen.

Largimi i Tikhanovskaya vjen pas përshkallëzimit të protestave në Bjellorusi ku mbrëmjen e së hënës u raportua dhe për një viktimë mes protestuesve.

Përshkallëzimi i situatës në Bjellorusi ndodh pasi Tikhanovskaya humbi zgjedhjet presidenciale përballë Alexander Lukashenkos, i cili drejton vendin prej vitit 1994. Ky thuhet se mori mbi 80% të votave, ndërsa Tikhanovskaya nuk e pranoi rezultatin me pretendimet për manipulime në zgjedhje.

Dyshimet kryesore të opozitës janë prej faktit se në zgjedhje nuk kishte vëzhgues dhe komisionerë duke lënë hapësira për manipulime. Bashkimi Evropian dhe Shtetet e Bashkuara të Amerikës e kanë kritikuar procesin si dhe përshkallëzimin e dhunës.

Tikhanovskaya garoi në zgjedhje, pasi bashkëshortit iu ndalua të kandidonte dhe në fillim të vitit u arrestua me akuzat se ka bashkëpunuar me mercenarë rusë, akuza të cilat janë mohuar kategorikisht.

Policia vazhdoi edhe të hënën të shpërndante protestuesit me plumba gome dhe gaz lotsjellës, ndërsa një protestues humbi jetën pasi një objekt shpërthyes i shpërtheu në duar. /CNA.al





Lajmet e fundit nga