"KLGJ duhet të kishte sjellje më institucionale"/ Krasniqi: Dvorani në krye të KED sipas ligjit

30 Prill 2020, 13:53, Politikë CNA

Analisti Afrim Krasniqi ka folur për çështjen e nxehtë mes presidentit Ilir Meta dhe kreut të Këshillit të Emërimeve në Drejtësi, Ardian Dvorani, si dhe për situatën politike në vend

Krasniqi deklaron se Reforma në Drejtësi nuk është më prioritet ndaj askush nuk flet për të. Sipas tij, ende nuk kemi as akte konkrete në mbështetje të kësaj reforme.

Ndërkohë për emërimet në Gjykatën e Lartë i dha të drejtë Kreut të Shtetit, ndërsa qëndrimi i Dvoranit në krye të KED pretendon se ka qenë brenda ligjit.

“Ka ndodhur ndryshimi që për herë të parë kemi 3 anëtarë të rinj në Gjykatën e Lartë, kur deri dje ishte vetëm një anëtar. Në rrethana të tilla duhen rishikuar shumë gjëra, përfshirë edhe mandati i anëtarit i cili ka rreth 15 vjet në detyrë, duke qenë zyrtari shqiptar me mandatin më të gjatë në historinë e tranzicionit në Shqipëri. Presidenti ka të drejtë në shqetësimin e tij dhe mendoj që KLGJ-ja duhet të kishte një sjellje shumë më institucionale ndaj rastit sepse ne kemi mësuar në auditore apo në libra se demokracia, shteti ligjor, funksionimi i një shteti, nuk është gjithmonë procedurë, lidhet edhe me integritetin, parimet dhe normat. Në këtë rast, shohim që integriteti, parimet dhe normat janë nënvlerësuar tërësisht, duke i dhënë prioritet procedurës teknike. Zoti Dvorani nuk ka shkelur Kushtetutën dhe ligjin, ai ka qëndruar në detyrë përsa kohë ia ka lejuar Kushtetuta dhe ligji, për shkak se nuk ka qenë i zëvendësuar, madje i ka bërë shërbim vendit në momentin që e ka lënë Gjykatën Kushtetuese me një adresë, me një person i cili funksiononte duke qenë anëtar i vetëm i kësaj gjykate. Por, në momentin kur është plotësuar me 3 anëtarë të rinj gjykata, çdo ditë e mëtejshme qëndrimi në detyrë, personalisht e shoh të gabuar dhe mesazh të gabuar për Reformën në Drejtësi sepse të gjithë kemi thënë që kjo reformë do të sjellë një sjellje krejt tjetër të institucioneve ndaj drejtësisë dhe në rastin konkret kemi përdorim të normave teknike, me argumentin që KED-i është zgjedhur në dhjetor dhe ka mandat 1-vjeçar dhe të gjithë anëtarët e KED-it do të duhet të vazhdojnë funksionin 1-vjeçar. Në rastin konkret nuk mendoj që vlen ky argument, për më tepër që KED-i në përvojën e vitit të kaluar dhe nga opinioni i paraqitur tashmë në mënyrë informale nga Komisioni i Venecias ka marrë një vlerësim negativ për punën e tij, duke na prodhuar një krizë të re kushtetuese dhe politike në Shqipëri?, tha Krasniqi”, deklaroi analisti në A2./ CNA.al