"Më fyejnë kur thonë se jam kundër Berishës"/ Nano: Njerëzit publikë shihen si ushtarë të partive

28 Prill 2020, 20:04, Politikë CNA

Gazetari Mustafa Nano ka deklaruar mbrëmjen e sotme se duke u bazuar në debatin politik, shumë personazhe publikë nuk kanë arritur të shprehin atë që mendojnë.

Nano thotë se duke shprehur qëndrimet e tyre vetëm për politikë, personazhet publike janë etiketuar si pro Ramës apo pro Bashës. Ai theksoi se ndihet i fyer kur e etiketojnë si gazetar kundër Berishës.

“Në shumë studio televizive, debati politik bëhet rreth çështjes: PD apo PS? Basha apo Rama? Edhe njerëzve që marrin pjesë në këto debate nuk u jepet mundësi tjetër, veçse të nxjerrin në shesh se me kë janë, me Ramën apo me Bashën. Dhe kështu, ne nuk kemi mundësi të marrim vesh se çfarë mendojnë personazhet politikë e publikë mbi botën, cilat janë pikëpamjet e tyre. Bën vaki që ata nuk mendojnë asgjë (ka që nuk mendojnë), por edhe sikur të mendonin, nuk do t?u jepej mundësia të shprehnin atë që mendojnë. Por edhe sikur t?u jepej mundësia, këtë do ta bënin veç në kuadrin e ndarjes PD-PS. Dhe kështu, në fund do t?u mbetej veç një etiketë: pro Ramës apo pro Bashës. Ose, që është e njëjta gjë, kundër Ramës apo kundër Bashës. Siç më ka mbetur mua etiketa e gazetarit anti Berisha”, u shpreh ai gjatë monologut në emisionin e tij “Provokacija”.

Gazetari deklaroi më tej se njerëzit publikë sot po shihen si ushtarë të partive politike.

“Shumica e njerëzve që ndjekin jetën publike në këtë vend, po t?i pyesësh se kush është Mustafa Nano, do të përgjigjen: është ai gazetari kundër Berishës. Është mënyra më e mirë për të më fyer mua. Është mënyra më e mirë për të zhvleftësuar të gjithë karrierën time si gazetar. Të gjitha qëndrimet e mija lidhur me çështje të tjera, dhe nuk janë një e dy, janë shumë, nuk kanë asnjë rëndësi për ta. Pse ndodh kjo? Ndodh sepse ata janë të trashë? Jo, kjo ndodh sepse ne i kemi mësuar që ata të shohin te njerëzit publikë veç ushtarë të PD-së e PS-së. Dhe me këtë logjikë nuk kanë përtuar t?u vënë etiketa edhe njerëzve që shprehen rrallë, një herë në pesë vjet, apo edhe më rrallë, ose kurrë”, nënvizoi Nano./ CNA.al