Andi Përmeti bojkoton seancën parlamentare të 16 prillit/ "Më ndaluan të drejtën e fjalës"

11 Prill 2020, 12:14, Politikë CNA

Deputeti i Bindjes Demokratike Andi Përmeti ka reaguar lidhur me seancën e radhës parlamentare që pritet të mbahet më 16 prill, për të cilën thotë se i është ndaluar e drejta e mbajtjes së fjalës.

Përmeti tregon se gjatë këtyre ditëve ka menduar gjatë se sa e nevojshme është seanca e datës 16 prill për shkak të nevojshmërisë për tu mbledhur fizikisht.

Ai thotë se ka qenë në dilemë të madhe nga rreziku i mbledhjes së 150 personave në një sallë.

“Dilema ka qenë në rrezikun që sjell njëe seancë e tillë, jo për mua personalisht por për shqiptarët. Në një sallë relativisht jo shumë të madhe, pa dritare, vetëm me ajër të kondicionuar do mbidhen rreth 150 persona. Grumbullimi më i madh që prej shfaqes së virusit. Disa prej tyre kanë kaluar moshën 65 vjeç, disa kanë kaluar edhe moshën 70 vjeç. Disa prej tyre kanë sëmundje kronike, disa prej tyre kanë qenë në aktivitet të plotë këto ditë në zonat e tyre dhe madje ka ndonjë që edhe ka bërë disa mbledhje me grupe njerëzish. Rreziku i të qenit dikush mbartës pa e ditur dhe më pas trasmetimi në një ambient me 150 persona shumica e të cilëve do të shpërndahen më pas në zonat e tyre në gjithë Shqipërinë do të rrezikonte një shpërthim të ri të virusit. Personat që do jenë në atë sallë do takojnë familjarët. Dikush do shkojë në market, dikush në farmaci. Rreziku i përhapjes së Covid-19 te persona që jetojnë në çdo qytet të Shqipërisë rrjedhimisht sjell rrezikun e përhapjes më pas të virusit në gjithë Shqipërinë. Zgjidhja do ishte zhvillimi i seances online”, shkruan ai në rrjetet sociale.

Deputeti tregon se sot i ka ardhur një email zyrtar nga Kuvendi ku thotë se 17 deputetë të pavarur kanë vetëm 5 minuta kohë për të folur, ndërkohë që thekson se nuk do të shkojë në seancë.

“Gjatë këtyre ditëve kam menduar mbi nevojshmërinë time për të qenë prezent në një seancë të tillë për të kundërshtuar ndryshimet e pritshme në Kodin Penal. Ato çmenduritë e dënimeve me 10 vite burg për personat jo mbartës që dalin nga shtëpia për të kryer pazar. Në fund të fundit brenda asaj salle unë zoteroj fjalën në foltore dhe votën. Fjala sot mu ndalua nga Edi Rama. Me email zyrtar Kuvendi njofton që 17 deputetë të pavaruar kanë 5 minuta kohë për të folur. Në varësi të rregjistrimeve të folësve diku ndërmjet 18 sekonda-37 sekonda për të folur. Një tallje me fjalën e lirë. Një mënyrë për të mbytur çdo argument të mundshëm kundër çmendurive të kryeministrit. E vetmja arsye për të shkuar në seancën e datës 16 prill, në një situatë të ngarkuar dhe të rrezikshme ishte kryerja e detyrës ndaj qytetarëve, ndaj shqiptarëve. Edi Rama këtë ma ndaloi. Për këtë arsye unë refuzoj të shndërrohem pa dijeninë time në rrezik për çdo qytetar me të cilin shkëmbehem në market a në farmaci. Qëndrimin tim, fjalën time do e kem publike këtu në facebook. Në këtë mënyre kryej detyrën time duke mos rrezikuar askënd”, nënvizon Përmeti./ CNA.al