Shkarkimi i prefektit të Shkodrës/ Reagon ashpër Spahia: Justifikim tejet qesharak

11 Prill 2020, 15:14, Politikë CNA

Ish-deputeti i Partisë Demokratike Bardh Spahia ka reaguar lidhur me shkarkimin nga detyra të prefektit të qarkut të Shkodrës, Çesk Millja dhe caktimin në vend të tij të zv.ministrit të Brendshëm, Besfort Lamallarit.

Spahia deklaron se shifrat totale u rritën pasi u rrit numri i testimeve, gjë që sipas tij tregon se situata në terren është tjetër nga shifrat e ofruara. Demokrati pretendon se Shkodra ka patur pak vëmendje nga qeveria. Ai e cilëson qesharak justifikimin për shkarkimin e Milljas.

“Pasi i sulmoi pacipësisht kryetaren e Bashkisë dhe qytetarët e Shkodrës për situatën me COVID-19, Rama e bëri një kurban nga rradhët e veta, për t?ia hedhur përgjegjësinë, prefektin e Shkodrës. Tejet qesharak justifikimi, se prefekti nuk paska treguar lidership e vendimmarrje, kur dihet mirë se as ministrat nuk guxojnë të vendosin vetë, nën pushtetin e Edi Ramës. Eshtë thjesht mënyra se si një individ, i përdor njerëzit si lecka njëpërdorimëshe, por edhe frika që ka nga Shkodra, edhe nga vetë socialistët shkodranë, të cilëve po u centralizon edhe drejtimin e një institucioni vendor si Prefekti, me një të përzgjedhur nga Tirana. Njëlloj siç u ka bërë edhe me partinë, nuk merr në konsideratë asnjë socialist vendas që t?i japë besim, por kjo është një çështje e tyre e brendshme. Sidoqoftë, fakt është se kjo qasje ndaj Shkodrës ka sjellë mungesën e vëmendjes institucionale në këtë kohë sfiduese me virusin Korona, dhe Rama përgjegjësinë po e hedh edhe tek të vetët”, shkruan ish-deputeti në rrjetet sociale.

Sipas tij, çdo funksionar vendor i djathtë apo i majtë dhe çdo anëtar i personelit shëndetësor, e di mirë se qeveria u ka ofruar vetëm presion për të mos folur, për të mos u ankuar për pajisjet e munguara mbrojtëse, për mungesën e testeve e madje edhe moszbatimin nga policia të detyrimit për karantinim të shtetasve të ardhur nga Italia.

Spahia pretendon se kurbanët brenda vetes janë problemi i Ramës dhe i ndjekësve të tij. Demokrati kërkon mbështetje për Shkodrën me të gjitha mjetet që i duhen për t?u përballur me COVID-19, pasi e cilëson këtë si detyrim institucional e shtetëror në çdo vend demokratik./ CNA.al