Kompanitë celulare duhet të vihen në shërbim të situatës/ Si mund t’iu vijnë në ndihmë qytetarëve

12 Mars 2020, 11:39, Sociale CNA

Numri i personave të prekur nga koronavirusi në Shqipëri vijon të rritet. Ministria e Shëndetësisë mesditën e sotme bëri të ditur se tashmë në vendin tonë kemi 23 raste të konfirmuara të infektuar nga COVID-19.

Por, ndërsa Shqipëria vijon betejën me koronavirusin, ndihma e gjithësecilit është shumë e vlefshme për përballimin e kësaj situate.

Një ndër asetet shumë të vlefshme për t?u vënë në shërbim të situatës janë edhe kompanitë celulare.

Për çfarë mund të përdoren konkretisht?

Së pari për të përçuar mesazhe tek abonentët e tyre. Ata kanë me miliona abonentë dhe kanë të gjithë numrat e klientëve. Mesazhet që përçohen nga mediat dhe nga rrjetet sociale sado të fuqishme të jenë, apo sado direkte të jenë, një përqindje të caktuar njerëzish ndoshta edhe nuk e prekin.

Nëpërmjet shërbimeve të klientit (call centers) që kanë në dispozicion për t?u shërbyer klientëve të tyre, ata mund të shndërohen shumë thjeshtë në qendra për pritjen e telefonatave të emergjencës që tashmë shkojnë vetëm tek 127, e cila punon jashtë kapaciteteve të saj.

Njerëz të trajnuar mund t?u bashkangjiten këtyre skuadrave dhe mund të bëjnë të mundur shërbimin e shumë më shumë telefonatave që bëhen aktualisht. Abonentët e secilës telefoni celulare janë shumë familjarë me numrat e shërbimit të klientit, dhe do të jetë e thjeshtë për ta. Kjo kërkon vetëm pak organizim nga ana logjistike dhe gjithashtu zhvillim për të organizuar mbajtjen e të dhënave dhe koordinimin me emergjencat dhe instancat e tjera shoqërore.

Kompanitë celulare mund të përdorin call centerat e tyre apo edhe call centerat e tjera publike, duke u vënë në shërbim të qytetarëve në këto momente, pasi është një moment alarmi për vendin.

Dërgimi i mesazheve direkt nga call centerat apo qendrat e kompanive celulare do të ishte mjaft e efektshme në këtë kohë.

Pra, mund të përçohen mesazhe, informacione direkt nga Ministria e Shëndetësisë, mund të përdoret 127 edhe nga call centerat e kompanive duke vendosur persona të trajnuar.

Por, më e rëndësishmja është përçimi i mesazheve, që njerëzit të mos kenë panik, por të kenë qartësinë, kujdesin dhe informimin e duhur në këtë proçes, ku kërkohet që secili të japë kontributin e tij. Qytetari së pari duke qëndruar në shtëpi.

Kompanitë celulare duke vendosur në shërbim numrat e telefonit, databasen e tyre, duke e bërë këtë shërbim për emergjencat, do të ishin një ndihmë e çmuar, duke i njoftuar njerëzit për të mos dalë në rrugë, duke i njoftuar për masat që duhet të marrin, 24 orë në 24.

Përtej mesazheve mund të kryejnë edhe shumë shërbime të tjera, por ky është një hap i parë që do të ishte shumë i rëndësishëm dhe do të tregonte edhe solidaritetin e madh të tre kompanive mobile që janë në Shqipëri.

Sot në Shqipëri nuk ka nje njeri pa një telefon celular, por njerëz pa facebook dhe twitter mund të ketë me qindra apo mijëra. Por, pa celular nuk ka njeri. Ç?ka do të thotë se qeveria duhet të kërkojë ndihmën e këtyre kompanive dhe ato të vihen në shërbim të situatës, për të gjetur një mënyrë komunikimi.

Shteti, qeveria vetë duhet ta mendojë këtë hap si një kontribut të vyer për qytetarët./ CNA.al