Rrëzohet propaganda anti-KÇK / Nuk justifikoi pasurinë, Rama shpërblen bashkëshorten e Denar Bibës

16 Shkurt 2020, 10:36, Politikë CNA

Partia Demokratike vijon të hedhë akuza të forta në drejtim të kryeministrit Edi Rama.

Në një deklaratë për mediat, ish-deputeti Klevis Balliu u shpreh se emërimi i Elona Kanas, bashkëshortes së Denar Bibës, në detyrë shtetërore rrëzon propagandën anti-KÇK, të e Edi Ramës.

Sipas Balliut, Elona Kana është emëruar nga Rama në detyrë shtetërore, megjithëse ajo dështoi të justifikojë pasurinë gjatë vetingut.

Kujtojmë këtu se Elona Kana, me detyrë këshilltare në Gjykatën e Lartë ka dhënë dorëheqjen në tetor 2019, vetëm pak ditë para se të dilte para trupës së vettingut ku do të jepej vendimi për pastërtinë e figurës dhe të ardhurat.

?E gjithë propaganda e Edi Ramës për gjoja pastrimin e sistemit të drejtësisë nga të korruptuarit rrëzohet nga një vendim i vetë qeverisë së Edi Ramës për të mbajtur në administratën e tij ata që nuk e kalojnë vetingun.

Një nga rastet më flagrante të standardit të dyfishtë të Edi Ramës është vendimi për t?i gjetur një punë në shtet bashkëshortes së nënkryetarit të Komisionit Qendror të Zgjedhjeve, Denar Biba, pasi ajo dështoi të kalojë vetingun.

Këshilltarja e Gjykatës së Lartë, Elona Kana, u tërhoq nga sistemi i drejtësisë pak para daljes së vendimit të vetingut, sepse nuk justifkonte dot pasuritë e saj dhe të shërbëtorit të Ramës në Komisionin Qendror të Zgjedhjeve.

Por me një vendim qeverie këtë javë, Edi Rama e ka emëruar bashkëshorten e Denar Bibës në një post në Entin Rregullator të Ujit.

Megjithëse nuk justifikoi pasurinë, megjithëse u tërhoq para se vetingu ta shkarkonte nga detyra e këshilltarës në Gjykatën e Lartë, kamikazi i Edi Ramës në KQZ, i cili organizoi votime të paligjshme pa opozitën, u shpërblye.?-u shpreh Balliu.

Më tej, ai theksoi se lufta kundër korrupsionit në dorën e Edi Ramës është vetëm propagandë.

?Ai ndryshe flet dhe ndryshe vepron. Edi Rama flet për luftë kundër bandës KÇK në drejtësi, por ata që nuk kalojnë vetingu, i emëron në detyra të tjera shtetërore.

Edi Rama flet për ndjekje penale ndaj atyre që nuk justifikojnë pasurinë para vetingut, por kur këta I kanë shërbyer pushtetit të tij të paligjshëm, ai hedh në kosh edhe një nga kushtet kyç të Bundestagut për hapjen e vërtetë të negociatave me Shqipërinë.?-theksoi ish-deputeti./ CNA.al