Basha pranë banorëve të Durrësit/ Objektet të vlerësohen pa vonesa

5 Dhjetor 2019, 19:24, Politikë CNA

Kreu i opozitës Lulzim Basha ka shkuar sot pranë banorëve të Durrësit, të cilëve i janë dëmtuar banesat nga tërmeti.

Basha deklaron se banorët i kanë shprehur shqetësimin, ndërsa pretendon se askush nga bashkia nuk i ka sqaruar dhe nuk i ka ardhur në ndihmë edhe pse kanë mungesë ushqimesh.

?Në Durrës banorët kanë ditë të tëra që flenë me fëmijët në çadra ose makina sepse vlerësimi i banesave nuk ka përfunduar ende dhe ndjehen të pasigurt të kthehen në apartamente.

Ata u shprehën të shqetësuar se askush nuk është interesuar dhe se kur kanë kerkuar sqarime në bashki, nuk kanë gjetur përgjigje. Ankesa patën po kështu për mungesën e ndihmave në këto ditë të vështira për ta?, shkruan lideri i opozitës në një postim në rrjetet sociale.

Kryedemokrati kërkon që vlerësimi i pallateve dhe shtëpive të kryhet pa vonesa, si dhe të ndihmohen të gjithë qytetarët që kanë mbetur në çadra.

?Qeverisja lokale dhe qendrore e ka për detyrë tu vijë në ndihmë dhe tu përgjigjet qytetarëve në çdo kohë, dhe tani më shumë se kurrë për shkak të traumës që kanë kaluar nga tërmeti.

Vlerësimi i pallateve dhe shtëpive është i domosdoshëm dhe duhet të kryhet pa vonesa. Për këtë arsye qeveria duhet të angazhojë pa humbur kohë inxhinierët që janë të gatshëm të kontribojnë. Organizimi dhe autorizimi shtetëror i një kontigjenti prej 500 inxhinierësh të gatshëm të angazhohen, do të mundësonte përfundimin pa sorollatje të vlerësimit të çdo objekti të dëmtuar nga tërmeti, në mënyrë që qytetarëve tu jepet qartësi dhe siguri?, thekson Basha./ CNA.al