Kërcënimi i Ramës ndaj mediave/ Ish-ministri rendit arsyet pse është një deklaratë e rëndë dhe shqetësuese

29 Nëntor 2019, 10:17, Politikë CNA

Ish-ministri Genc Pollo ka reaguar pasi kryeministri Edi Rama,kërcënoi se do të mbyllë portalet dhe websitet, nëse përhapin informacione të rreme nga tërmeti dhe që ngjallin panik te qytetarët.

Në një postim në rrjetet sociale, Pollo e cilëson shumë shqetësuese deklaratën kërcënuese të kryeministrit.

?Deklarata e Edi Ramës se do të mbyllë portalet e ëebsitet informative është më e gabuara e më shqetësuesja e 72 orëve të fundit.?-shkruan Pollo.

Më tej, ai rendit edhe katër arsyet se pse sipas tij ajo është një deklaratë shqetësusese.

?Së pari, pasi edhe në rastet e lajmeve të rreme dhe panikshkaktuese në situata emergjente nuk lipset të dirigjohet vemendja publike në këtë mënyrë drejt këtyre lajmeve. Nëse një autoritet shtetëror kërcënon me mbyllje mediash pa sqaruar mirë çeshtjet e pa dhënë versionin zyrtar mbi pretendimet gjasat janë se në publik, e jo vetëm tek mendjet konspirative, do të zerë vend lajmi i rremë.
Së dyti, me sa e kam ndjekur unë, media në tërësi ka raportuar në mënyrë objektive nga terreni dhe në kushte të vështira. Ka përcjellë jo vetëm informacion, por direkt e indirekt, ka nxitur edhe solidarizimin shoqëror me viktimat e tërmetit. Për këtë meriton një falenderim publik.
Së treti kemi precedentin e shtatorit kur disa media në mënyrë joprofesionale e të qortueshme shkatuan panik pas tërmetit. Ndër to kishte edhe miqësore edhe kritike me qeverinë por Edi Rama zgjodhi të sulmonte nominalisht përmes facebook.ut e policisë vetëm ato kritike. Ky politizim e uli besueshmërinë e “motivit të ndershëm”.
Së katërti edhe në kushtet e situatës së jashtëzakoshme qeveria apo tjetërkush nuk ka tagër ligjor të kufizojë a të mbyllë mediat.
Së pesti dhe më e rëndësishmja deklarata e Ramës u bë në sfondin e dy projektligjeve mbi median të cilat i japin atij mundësinë të mbyllë më urdhër çdo portal a pastaj t’u thotë atyre “shihemi në gjyq”. Projektligjet, të cilat po shqyrtohen në Kuvend, janë denoncuar nga opozita, shoqëria civile, media e pavarur dhe komuniteti ndërkombëtar si rrezik për fjalën e lirë.
Për të gjitha këto arsye nuk gabojmë nëse konkludojmë se këto fjalë të Edi Ramës janë diçka më e rëndë se një “deklaratë e gabuar”.?-shkruan Pollo.