E fundit!

15:57 Aktualitet

VIDEO-Vrasja në Maliq, Lamallari “zbarkon” në Policinë e Korçës

Ministri i Brendshëm, Besfort Lamallari, ka zbarkuar në Dr...

Nga pasuria e dyshimtë tek lidhja me krimin/ Shkarkohen 40 gjyqtarë dhe 26 prokurorë

17 Nëntor 2019, 12:31, Vetingu CNA

Për një vit e shtatë muaj, janë shkarkuar 40 gjyqtarë, 26 prokurorë dhe ndihmës-ligjorë.
Nga muaji i shkurt i vitit 2018 deri në muajin gusht të vitit 2019, Vettingu ka përgjysmuar kryesisht gjykatat por dhe prokuroritë, në pjesën më të madhe për shkak të pasurisë së pajustifikuar.

Edhe disa raporte pozitive të dërguar nga ILDKPKI, pas hetimeve të thelluara nga Komisionit të Vettingut, kanë ndryshuar rrjedhë. Kjo për shkak se ILDKPKI, i ka kompetencat e kufizuara dhe nuk i ka të gjitha mekanizmat për të kryer hetime të detajuara rreth pasurisë së gjyqtarëve dhe prokurorëve.

Konkretisht ILDKPKI i ka të dhënat që prej vitit 2003, pra kryen kontrolle për periudhat nga 2003 kur eshte krijuar si institucion dhe deri më 20 janar 2017 kur filloi Vettingu. Për më tepër ILDKPKI nuk ka akses në sistemin TIMS dhe as tek të dhënat jashtë Shqipërisë.

Ndërkohë që CNA.al mëson se janë shumë raporte të ILDKPKI-së me probleme, që janë përmbysur nga organet e Vettingut.

Me probleme kanë dalë nga ILDKPKI, raportet për subjektet e rivlerësimit Ardian Dvorani, gjyqtar në Gjykatën e Lartë, ish këshilltaret e Kushtetueses Elsa Toska dhe Fjona Papajorgji, Mehdi Bici, gjyqtar i Gjykatës së Lartë, Bujar Sheshi, prokuror I Krimeve të Rënda, dhe anëtar i KLP-së si dhe ish këshilltarja e Gjykatës së Lartë, Elona Kana e njohur si bashkëshortja e anëtarit të KQZ-së Denar Biba. Por, ka edhe raporte të tjera, për të cilat do të raportojmë në ditët në vijim.

Alarmante janë edhe të raportet e DSIK-ut, të cilat janë përmenduar në seancat dëgjimore të KPK për secilin nga subjektet.

Hetimet e Vettingut

Komisioni i Pavarur i Kualikimit nga data 8 shkurt 2018 deri në datën 31 gusht 2019 ka dhënë 189 vendime.
81 vendime për konfirmimin në detyrë të 33 gjyqtarëve, 40 prokurorëve dhe ndihmësve ligjorë/kandidatë për magjistratë; 68 vendime për shkarkimin nga detyra të 40 gjyqtarëve, 26 prokurorëve dhe ndihmësve ligjorë/kandidatë për magjistratë.

Gjithashtu janë dhënë 15 vendime për ndërprerjen e procesit të 10 gjyqtarëve, 4 prokurorëve dhe 1 ish-ndihmës ligjor, 8 vendime për pushimin e procesit të 3 gjyqtarëve, 1 prokurori dhe 4 ndihmësve ligjorë, 16 vendime për përfundimin e procesit pa një vendim përfundimtar, për kryeinspektoren e Këshillit të Lartë të Drejtësisë, 10 gjyqtarëve dhe 5 prokurorëve si dhe 1 vendim për pezullim nga detyra për një periudhë 1-vjeçare.

Komisioni i Pavarur i Kualifikimit ka dhënë 178 vendime me unanimitet, ku të gjithë anëtarët e trupit gjykues kanë votuar në mënyrë të njëjtë dhe 11 vendime me shumicë votash.
Sipas raporteve të ILDKPKI-së për 150 subjekte rivlerësimi, kanë rezultuar pa probleme me pasurinë 102 subjekte rivlerësimi dhe me probleme 48 prej tyre.

Ndërkohë që hetimi i kryer nga Komisioni i Vettingut, ka dhënë rezultate të tjera, sipas të cilit 67 subjekte pa probleme me pasurinë dhe 83 subjekte me probleme.
Nga raportet e DSIK-së për 131 subjekte rivlerësimi, kanë rezultuar të papërshtatshëm për vijimin e detyrës 27 subjekte rivlerësimi, ndërkohë që nga hetimi i Komisionit rezultuan me probleme 19 prej tyre./CNA.al