Spartak Ngjela: Cilat duhet të jenë sfidat kombëtare të Albin Kurtit

7 Tetor 2019, 19:01, Kosova & Bota CNA

Avokati i njohur, Spartak Ngjela, ka reaguar pas ndryshimit të madh politike të ndodhur ditën e djeshme në Kosovë, ku VV dhe LDK dolën fituese të zgjedhjeve të parakohëshme parlamentare.

Përmes një statusi në rrjetet sociale, Ngjela është shprehur se është më se e drejtë që Serbia të paguajë ndaj Kosovës ?…Të gjitha dëmet që i kanë shkaktuar hordhitë barbare të Millosheviçit, duke filluar nga vrasjet, por edhe dëmtimin psikik të një populli të tërë?. Por Avokat-politikani shtron dhe sfidat kombëtare që i dalin para Albin Kurtit, në rolin e kryeministrit të qeverisë së re.

Postimi i plotë i Spartak Ngjelës:

Albin Kurti fitoi dje zgjedhjet në Kosovë.
Mendohet se, bashkë me Vjosa Osmanin, ky do të jetë binomi antikorrupsion.

Po të jetë kështu, binomi Kurti-Osmani, do të jetë një hap cilësor për të gjithë botën shqiptare në Ballkanin Perëndimor, dhe sidomos në Shqipëri.
Atëherë:
Cilat duhet të jenë sfidat kombëtare të kryeministrit Albin Kurti?
Këto janë më thelbësoret:
Varrosja përfundimisht e konceptit të lëshimit të territorit shqiptar.

Goditje drastike korrupsionit mesjetar në Kosovë.

Goditje drastike neoosmsnizmit të Erdoganit në Kosovë; që të reflektojë edhe në Shqipërinë aktuale.

Të ngrihet në vendin e duhur personaliteti i fituesit në negociatat me Serbinë.

Dokument i veçantë politik për bashkëpunimin politiko-juridik Shqipëri-Kosovë dhe lansimi faktik i historisë së Shqipërisë dhe shqiptarëve, si botë reale dhe më e vjetra në Ballkanin Perëndimor.

Doktrinë për integrimin panshqiptar në Ballkanin Perëndimor.

Kërkesa ndaj Serbisë, me faturë perfekte, të të gjitha dëmeve që kanë shkaktuar hordhitë barbare të Milosheviçit: vrasjet masive dhe shkatërrimin e mijra shtëpive në Kosovë; por edhe dëmet e tjera që kanë të bëjnë me fitimin e munguar dhe dëmtimin psikik të një populli të tërë.

Fatura e dëmeve të genocidit serb, e kërkuar botërisht, do të jetë ngritje reale e dinjitetit shqiptar në arenën ndërkombëtare, dhe do të përbëjë një goditje reale kundër korrupsionit dhe shitjes së interesit kombëtar që ka ndodhur në Kosovë, sidomos në këta dhjetë vjetët e fundit; por, edhe në Shqipëri në periudhën 1992-2019.

I uroj sukses qeverisë së përbashkët, Albin Kurti dhe Vjosa Osmani, nëse ajo do të formulohet kështu.

/CNA.al