"Zgjedhja" e gabuar me rastin "Pjetri/ Juristët e PS, po e çojnë Ramën në zgjedhje të parakohshme

28 Gusht 2019, 14:21, Aktualitet CNA

Ditë më parë CNA.al paralajmëroi që e vetmja rrugë që siguronte transferimin ligjor të pushtetit lokal në Shkodër dhe vazhdimësinë brenda kufijve të ligjit, ishte që Valdrin Pjetri të merrte qoftë edhe për 1 orë detyrën dhe pastaj të zgjidhte dorëheqjen, shkarkimin nga Këshilli i Ministrave apo vetvrasjen.

Çdo opsion tjetër i jepte argument presidentit Meta që i justifikuar nga shpikja procedurale e Ramës, të insistonte në shpikjen e vet për zgjedhje në datën 13 Tetor.

Rama zgjodhi shpikjen procedurale dhe juristët e PS sot bëjnë sikur nuk po gjejnë dot zgjidhjen për ta detyruar Presidentin që të dekretojë zgjedhjet e parakohshme në Bashkinë Shkodër.

Asnjëri në PS nuk lexoi dot nenin 10 të kodit zgjedhor që flet për rastet kur për kandidatin verifikohen kushtet e pazgjedhshmërisë, përpara marrjes së mandatit.

Në rastet e parashikuara nga këto dispozita, KQZ ndërhyn vetëm pas konstatimit të ndalimit nga organi kompetent. Pra, nga Prokuroria e Republikës. Me dëshirën e mirë, maxhoranca mund të interpretonte që vendimi i konstatimit të papajtueshmërise sot, mund të merrej edhe nga Këshilli Bashkiak, meqë ai është konstituar. Kjo nuk po ndodh dhe në treg, në vend të zgjidhjes së largimit të Valdrin Pjetrit, pra deklarimit të përfundimit të mandatit të Pjetrit, është hedhur për konsum lista e emrave të zëvendëskryetarëve të bashkisë, Shkodër.

Siç CNA.al edhe më parë e paralajmëroi, maxhoranca po bën çdo gjë keq dhe duke u fshehur pas deklaratave që shprehin zhgënjim ndaj Valdrin Pjetrit, ka vetëm një qëllim. Të shpëtojë Valdrinin nga veprimi i ligjit të dekriminalizimit. Kësaj ia kanë arritur tashmë. Kaq ju kërkua juristëve të PS! Nuk ju kërkua gjë tjetër ndaj nuk po gjejnë dot zgjidhje se si do qeveriset Shkodra këto 4 vjet.

Sipas ligjit, Valdrin Pjetrit në cilësinë e tij si kandidat, nuk jep dot dorëheqje. Kodi zgjedhor nuk e njeh këtë të drejtë. Aq më pak pasi është shpallur rezultati dhe Valdrini është mandatuar me vendim gjykate si kryetar i bashkisë Shkodër.

Të gjithë sot po tallen.

Valdrin Pjetri u tall, sepse nëse e kishte seriozisht, duhet ta dorëzonte dorëheqjen në Këshillin Bashkiak të Shkodrës, ose tek Kryeministri Rama, por jo tek Komisioni Qëndror i Zgjedhjeve.

Rama u tall se bëri si i nxehur me Valdrinin dhe thjesht u tha juristave të vet: bëni ç’të doni, por nuk dua të dëgjoj më për atë gënjeshtar.

Kokat e jurisprudencës socialisto-rilindase u tallën, sepse nuk po gjenin dot ku ta lexonin nenin 10 të Kodit Zgjedhor dhe nenin 61 të ligjit që rregullon qeverisjen vendore. Kurse sot nuk po gjejnë dot se ku është neni që ia vë këmbët në një këpucë Presidentit, që ai të nxjerrë dekretin për zgjedhje të parakohshme për Shkodrën!

Meta u tall se tha: keni datën 13 Tetor, përdoreni se është edhe me dekret.

Kurse ne po bëjmë detyrën, ndaj po informojmë shqiptarët se si këta të gjithë po tallen.

O shqiptarë!

Neni 61 i ligjit të pushtetit lokal thotë:

1.Mandati i kryetarit të Bashkisë përfundon përpara afatit në rastet kur kryetari:

Sekretari i këshillit, për ndjekjen e procedurave të nevojshme, njofton prefektin për dorëheqjen e kryetarit.

Më shqip se kaq, pak ligje kanë mbetur në këtë vend! Duhet të jetë e qartë që sa kohë nuk janë ndjekur këta hapa ligjorë proceduralë që ezaurojnë përfundimin para kohe të mandatit të Valdrin Pjetrit, në Shkodër nuk do të mund të ketë zgjedhje të parakohshme.

Jo, sepse kështu i vjen për shtat dikujt, por sepse këtë thotë ligji që rregullon pushtetin vendor.

Dhe loja që po luajnë të gjithë, nuk çon dot Shkodrën në zgjedhje të parakohshme.

Por, mund të detyrojë Ramën të çojë gjithë Shqipërinë në zgjedhje të parakohshme. Meta aty është!… Mund ta shfuqizojë 13 Tetorin dhe të nxjerrë dekret të ri për 1 Janarin 2020. Këtë po presin edhe gjysma e grupit parlamentar të PS./CNA.al