Pas përzgjedhjes nga KLP/ Kërkohet 'koka" e prokurores së SPAK-ut

2 Gusht 2019, 13:11, Kronika CNA

Komisioneri Publik, Florjan Ballhysa ka apeluar vendimine KPK-së , për prokuroren e Krimeve të Rënda dhe të përzgjedhurën për në SPAK, Manjola Kajana.

Komisioneri Publik, gjatë trajtimit të vendimit nr. 84/2018, të Komisionit, është njohur me aktet lidhur me kallëzimin e disa qytetarëve të Bashkisë Fier, për paligjshmëri në ushtrimin e detyrës nga funksionarë bashkiakë të Bashkisë Fier, gjatë dhënies së kredive të buta (lehtësuese) për familje të pastreha.

Nga aktet e administruara gjatë hetimit administrativ të vendimit të sipërcituar, ashtu siç është trajtuar edhe në ankimin përkatës të Komisionerit Publik, në fillim të muajit korrik 2012, në Prokurorinë pranë Gjykatës së Rrethit Gjyqësor Fier rezulton të jetë regjistruar kallëzimi penal.

Me vendimin e vitit 2012, organi i Prokurorisë pranë Gjykatës së Rrethit Gjyqësor Fier ka vendosur mosfillimin e procedimit penal.

Kallëzuesit e kanë ankimuar vendimin në Gjykatën e Rrethit Gjyqësor Fier dhe kjo e fundit, dhe në vitin 2013, ka prishur vendimin e Prokurorisë Fier, duke urdhëruar kryerjen e veprimeve të nevojshme hetimore.

Ndërkohë, Prokuroria pranë Gjykatës së Rrethit Gjyqësor Fier kishte urdhëruar regjistrimin e procedimit penal për veprën penale ?Shpërdorim të detyrës?, kryer në bashkëpunim, dhe veprën penale të ?Falsifikimit të dokumenteve?, për fakte të njëjta, në ngarkim të zyrtarëve të Bashkisë Fier.

Për këto procedime penale, veprimet hetimore të Prokurorisë pranë Gjykatës së Rrethit Gjyqësor Fier janë shtrirë gjatë harkut kohor 2012 – 2014, ku përfundimisht çështja është dërguar për gjykim për veprën penale: ?Shpërdorim detyre? dhe ?Falsifikimit të dokumenteve?.

Kjo periudhë përkon me periudhën gjatë së cilës bashkëshorti i subjektit të rivlerësimit, në cilësinë e kryefamiljarit, ka ndjekur procedurat për përfitimin nga programi social i strehimit, ndërsa subjekti i rivlerësimit kryente funksionet e prokurores pranë kësaj Prokurorie.

“Komisioni, gjatë hetimit administrativ për subjektin e rivlerësimit znj. Kajana, nuk ka hetuar dhe administruar dokumentacion mbi gjendjen e mundshme të konfliktit të interesit midis subjektit të rivlerësimit në funksionin e prokurorit, në drejtim të përfitimit të një trajtimi preferencial, që mund të përbëjë një konflikt interesi, qoftë dhe në dukje me Bashkinë Fier.

Komisioneri Publik konstaton se mbetet i pahetuar fakti nëse subjekti i rivlerësimit të ketë përfituar statusin e pastrehë, që rezulton se nuk mund ta përfitonte bazuar në kërkesat e ligjit nr. 9232/2004, ?Për programet sociale të strehimit për banorët e zonave urbane?, për shkak të funksionit që ajo kryente në organin e Prokurorisë, që po hetonte zyrtarët e Bashkisë Fier, për të njëjtat shkelje të ligjit.”, thuhet në ankimimin e KP.