“Ne me punë ju me shpifje”/ Kryebashkiaku i ri i përgjigjet akuzave të PD

14 Korrik 2019, 18:49, Aktualitet CNA

Partia Demokratike ka vijuar me akuzat për manipulim të zgjedhjeve të 30 qershorit. Gjatë ditës së djeshme PD doli me një deklaratë për mediat ku tha se KQZ është kapur në flagrancë, duke evidentuar edhe votimin me vota të falsifikuara në Vaun e Dejës.

Lidhur me këto akuza, ka reaguar dhe kryetari i zgjedhur i Bashkisë së Vaut të Dejës, Mark Babani.

Përmes një postimi në rrjetet social, Babani shkruan se ka prova të pakundërshtueshme, foto, garanci ligjore dhe prezencë të vëzhguesve të OSBE-ODIHR-it që i gjithë procesi ka shkuar në mënyrë më të mirë të mundshme.

Deklarata e plotë

Lidhur me disa deklarata absurde dhe njëkohësisht qesharake të bëra nga zyrtarë të Partisë Demokratike si dhe mediat satelitë të saj, kam detyrimin të sqaroj opinionin publik se në Bashkinë Vau i Dejës, procesi zgjedhor në tërësi dhe dita e zgjedhjeve në veçanti ka qenë një proçes ku janë respektuar në menyrë rigoroze procedurat dhe detyrimet ligjore.
Ka prova të pakundërshtueshme, fotografi dhe garanci ligjore se ditën e shtunë pas mesnate kanë mbërritur të gjitha materialet zgjedhore, përfshirë fletët e votimit në KZAZ 06. Të pranishëm kanë qenë vëzhguesit e OSBE/ODIHR, një organizatë shumë më serioze dhe e besueshme se Partia Demokratike.

Ja pse Partia Demokratike nuk ka kredibilitet publik tanimë dhe e vetmja gjë që i ka ngelur, është shpifja:

Në deklaratën e sotme, Partia Demokratike, i mëshoi sërish akuzës se djegia e KZAZ 06 u ideua dhe u inskenua nga Edi Rama dhe Partia Socialiste ndërkohë që vetë ish-kryetari i Bashkisë së Vaut të Dejës, Zef Hila pranoi publikisht se ky sulm ishte i organizuar nga Partia Demokratike. Kjo tregon shumë për seriozitetin e kësaj partie dhe seriozitetin e deklaratave të saj.

Në pseudo-akuzat që qarkullojnë për zonjën Listina Ndoj, sipas të cilave ajo ka qenë njëkohësisht kandidate për anëtare të Këshillit Bashkiak dhe anëtare e KZAZ 06, ju informoj se:

Zonja Ndoj, e propozuar prej Partisë Socialiste si kandidate për anëtare në Këshillin Bashkiak, ka paraqitur dorëheqjen nga kandidimi, pranë KZAZ 06 dhe KQZ. Fakt lehtësisht i provueshëm prej autoriteteve përkatëse.

Gjithashtu, lidhur me pretendimin tjetër, referuar nenit 32 të Kodit Zgjedhor, për të shmangur konfliktin e interesit, sipas të cilit nuk lejohet që një anëtar i KZAZ të jetë në marrëdhënie pune me ndonjë prej kandidatëve garues, sqaroj se:

Unë Mark Babani, nuk jam Administrator i shoqërisë ?Mare Adriatik? shpk, prej datës 06.05.2019 ndaj në këtë pikë, konflikti i interesit nuk ekziston!

Ndërkohë që ata vazhdojnë me shpifje, ne do të vazhdojmë përpara me qëllimin e vetëm për të përmirësuar jetesën e çdo qytetari në Bashkinë e Vaut të Dejës, vetëm ndërmjet punës dhe jo fjalëve!/CNA.al