Votime nën presion dhe dhunë/ OSBE: Pamë prova, interesi i zgjedhësve u cënua

1 Korrik 2019, 14:36, Aktualitet CNA

Zgjedhjet vendore të 30 qershorit në Shqipëri u mbajtën pa marrë shumë në konsideratë interesat e zgjedhësve në një klimë ngërçi politik.

Në këtë përfundim kanë dalë vëzhguesit e Zyrës së OSBE-së.

“Opozita vendosi të mos marrë pjesë, por, pavarësisht kësaj, Qeveria ishte e vendosur t’i zhvillonte zgjedhjet.

Kandidatët për kryetarë bashkie garuan pa kundërshtarë në 31 nga 61 bashki gjithsej.

Në këtë kontekst, zgjedhësit nuk patën mundësi kuptimplotë për të zgjedhur mes opsioneve të ndryshme politike, përfundon deklarata.

Ndonëse një sërë partish politike, koalicionesh dhe grupesh qytetare dolën me kandidatë, mungesa e partive kryesore opozitare në zgjedhje e kufizoi ndjeshëm mundësinë e zgjedhësve për të zgjedhur kandidatët,” tha Ambasadorja Audrey Glover, drejtuese e misionit të ODIHR-it për vëzhgimin e zgjedhjeve.

Sipas saj, refuzimi fillimisht nga po ato parti për të emëruar anëtarë të administratës zgjedhore, plus interpretimi i politizuar më pas i ligjit zgjedhor, e lanë administratën zgjedhore të vendit të paekuilibruar dhe ulën besimin te zgjedhjet.

Më tej Glover e vuri theksin tek përplasjet politike, që sipas saj, çuan në pasiguri juridike dhe shumë prej vendimeve të administratës zgjedhore u morën duke pasur si objektiv garantimin e mbajtjes së zgjedhjeve.

“Ndonëse çështjet lokale u trajtuan në disa aktivitete të vogla, fokusi kryesor gjatë fushatës ishte mospjesëmarrja e partive kryesore opozitare dhe data e zgjedhjeve. Pati, gjithashtu, edhe pretendime të besueshme nga zgjedhësit për presione nga të dyja anët. Ne pamë prova se zgjedhësit u ndodhën nën presion nga të gjitha palët politike. Kjo, bashkë me fokusimin nga një media e polarizuar te kriza politike dhe jo tek ofrimi i informacioneve të paanshme rreth kandidatëve, i pengoi disa votues që të votonin të lirë dhe të bënin zgjedhje të mirëinformuara”, ka thënë më tej Glover.

Pozitive nga vëzhguesit e OSBE-së, është vlerësuar fakti që votat u numëruan përgjithësisht në mënyrë të qetë dhe paqësore.

“Më shumë se 3.5 milion vetë ishin regjistruar për të votuar dhe një përqindje e përafërt prej 21 përqind votuan në 5,410 qendra votimi në të gjithë vendin. Gjithsej, në të 61 bashkitë në vend ishin regjistruar 97 kandidatë per kryetarë bashkie, duke perfshirë 11 gra dhe 544 lista kandidatësh për këshillat vendorë, të cilat ishin te gjitha të ekuilibruara nga pikëpamja gjinore në përputhje me ligjin zgjedhor”, thuhej në raportin e gjetjeve paraprake të OSBE/ODIHR-it./CNA.al