E fundit!

14:27 Politikë

Rama: Nëse këtu do të kishte lavatriçe parash të pista, nuk do të mbyllnim kapituj me BE-në

Në aktivitetin e programit “Dyfisho sipërmarrjen tënde”, k...

IKMT shkatërron Syrin e Kaltër/ "Dallëndyshja me sqep" përfshihet në skandal

15 Prill 2019, 14:43, Aktualitet CNA

Syri i Kaltër është një vend turistik mjaft i frekuentuar jo vetëm nga qytetarët në Shqipëri por edhe nga turistë të huaj.

Syri i kaltër, një bukuri përrallore, për të cilën kanë shkruar edhe mediat huaja ndodhet në fshatin Muzinë të Rrethit të Delvinës, pranë rrugës nacionale Delvinë-Gjirokastër.

Duke qenë se është kandidat për Trashëgimi të Unesco, por jo vetëm për këtë arsye, Syri i Kaltër pretendohet që të ketë edhe përkujdesjen shtetërore.

Por çfarë ndodh realisht? Del “Dallëndyshja” e IKMT -së dhe me “sqepin” e saj e shkatërron, duke e shndërruar nga një pikë turistike në një pikë grumbullimi inertesh.

Kur jemi në prag të hapjes së sezonit turistik, pika më piktoreske ku nga një burim i kaltër me origjinë karstike nga Mali i Gjerë del një ujë i kristaltë, ka marrë një goditje të madhe nga Inspektoriati Kombëtar i Mbrojtjes së Territorit.

Eskavatorët e këtij institucioni me urdhër të drejtoreshës Dallendyshe Bici kanë shkatërruar çdo gjë që iu ka dalë përpara në këtë zonë turistike.

Pas këtij aksioni nga “Dallëndyshja” e cila me ardhjen e pranverës shkoi me “sqepin” e saj në këtë zonë dhe shkatërroi çdo biznes përreth Syrit të Kaltër, kjo zonë ka ngelur si e shkretë.

Promovimi i Syrit të Kaltër nga agjensitë e huaja dhe vendase ka sjellë një influencë të madhe në rritjen e turizmit në Shqipëri.

Mirëpo, me futjen e “sqepit të Dallëndyshes”, turistët që do të vizitojnë këtë zonë, nuk kanë ku të blejnë një shishe ujë dhe jo më të kenë luksin të pinë një kafe apo të hanë një drekë.

Është normale që të mos ketë ndërtime pa leje në pikat turistike, por institucionet kompetente, duhet të kenë një plan për vizitorët dhe turistët që shkojnë tek Syri i Kaltër.

Por, IKMT ka shkatërruar çfarë iu ka dalë përpara në këtë zonë turistike duke e kthyer Syrin e Kaltër në një zonë të shkretë.

Por përtej futjes së “sqepit”, Dallendyshja pas shembjes e ka lënë këtë zonë si një gërmadhë duke mos e pastruar.

Është dashur ndërhyrja e Ministrisë së Turizmit dhe angazhimi i ministrit Blendi Klosi për pastrimin e gërmadhës së krijuar nga IKMT-ja.

Më poshtë po sjellim dhe disa foto nga shkatërrimi i objekteve në këtë zonë./CNA.al