web counter
LEXO PA REKLAMA!

SHKARKO APP

App Store
Google Play

Arta Marku në "derën" e Kuvendit/ Kërcënon prokurorët me hetime displinore  

18 Mars 2019, 11:27, Aktualitet CNA

Prokurorja e Përgjithshme e Përkohëshme Arta Marku, pas Shkodrës është zhvendosur dhe në rrethe të tjera.

Në analizën e punës së Prokurorive, Marku ka apeluar Kuvendin.

Ajo ka kërkuar nga Kuvendi që të miratojë sa më shpejt ndryshimet ligjore që nevojiten pas vakumit të lënë nga vendimi i Gjykatës Kushtetuese në lidhje me procedimet displinore ndaj magjistratëve.

Sipas Markut, këto ndryshime duhet të bëhen sa më shpejt, pasi dispozita kalimtare e prokurorit të përgjithshëm nuk e lejon atë që hetimet disiplinore ndaj prokurorëve të shkojnë deri në fund.

Më tej ajo ka thënë se ka shumë ankesa të qytetarëve që kanë shkuar direkt në adresë të saj dhe një pjesë pranë mediave.

“Mosndërhyrja jonë ndaj prokurorëve të akuzuar është komentuar me nota denigruese, duke shtuar se kjo gjë nuk mund të bëhet përsa kohë nuk është zgjedhur Inspektori i Lartë i Drejtësisë, si autoriteti i vetëm që ka të drejtën për të hetuar prokurorët”, është shprehur Marku.

Sipas Prokurores së përgithshme të përkohshme, rrëzimi i ligjit për procedimet disiplinore ndaj magjistratëve në vitin 2017 nga Gjykata Kushtetuese ka lënë një vakum ligjor.

Marku ka shkuar më tej, duke dhënë alarmin për gjendjen aktuale të Prokurorisë.

“Në kushtet që po operon aktualisht sistemi i drejtësisë kur prokurorët veprojnë të pavarur apo të pandikuar tërësisht, funksionimi i mekanizmave displinorë është i domosdoshëm dhe  jetik dhe në mungesë të ketyre mekanizmave pavarësia nuk është asgjë tjetër veçse abuzim në kurriz të qytetarëve dhe cënim i imazhit të drejtësisë”, ka thënë Marku.

Kujtojmë se Marku synon drejtimin e organit të akuzës për 7 vite të tjera./CNA.al





Lajmet e fundit nga