E fundit!

07:46 Ekonomi

Çmimet e konsumit në të gjithë Evropën/ Vendet më të shtrenjta dhe më të lira, ja ku renditet Shqipëria

Nga Islanda në Maqedoninë e Veriut, çmimet e konsumit ndry...

Shënim/ Kush është krimi dhe politika

28 Shkurt 2019, 16:27, Aktualitet CNA

Partia Demokratike prej disa kohësh ka ndërmarrë sulme të pandashme ndaj Prokurorisë së Përgjithshme dhe në veçanti ndaj kryeprokurores Arta Marku, por edhe ndaj Prokurorisë për Krime të Rënda dhe në veçanti ndaj drejtueses së institucionit, Donika Prela.

Por, paralelisht dhe kohë më përpara Partia Demokratike ka akuzuar Saimir Tahirin si ministër i lidhur me drogën me krimin dhe me trafikantët.

Sot, ka ndodhur që Prokuroria, e cila është akuzuar si strukturë e lidhur me krimin dhe politikën ka ngritur akuzat ndaj ish-ministrit të Brendshëm Saimir Tahiri, në lidhje me grupe të strukturuara kriminale.

Thuajse të njëjtat akuza që ka thënë edhe Partia Demokratike. Ndërsa Edi Rama ka thënë se beson në pafajësinë e Tahirit.

Tani Prokuroria, ose është e lidhur me krimin, ose është Prokuroria që bën detyrën. Se, në rastin e Saimir Tahirit, prokuroria ka ngritur akuzë për të njëjtat gjëra që e ka akuzuar Partia Demokratike.

Tani Lulzim Basha, ose duhet t’i kërkojë ndjesë Prokurorisë, ose duhet të shohë se sa peshë ka fjala dhe si rëndon ajo. Sepse nuk mund të thuash për çdo gjë krimi dhe politika dhe nga ana tjetër për Saimir Tahirin të ngrihen akuza të njëjta me atë çfarë ka thënë PD.

Ajo çfarë bie në sy në këtë amulli akuzash është edhe një detaj tjetër.

Saimir Tahiri pas daljes nga Prokuroria e Krimeve të Rënda, tha se procedimi ndaj tij është i montuar politikisht.

Pasi u njoh me akuzat zyrtare, të cilat i kishte thënë më herët edhe PD, ai tha, se akuzat ndaj tij janë politike nga fillimi deri në fund.

Tani, Saimir Tahiri për akuzat e ngritura ndaj tij, thotë se Prokuroria e Krimeve të Rënda është e kapur politikisht.

Edhe Lulzim Basha, ka thënë dhe vijon të thotë se Prokuroria e Krimeve të Rënda është e kapur politikisht, ndërkohë që ndaj Tahirit janë ngritur akuza të njëjta me ato që ka thënë PD.

Mesa duket në Shqipëri, fjala s’ka më peshë, s’ka më vlerë edhe pse politika në vetvete dhe në thelb është edhe arti i fjalës. Duke thënë broçkulla çdo ditë dhe duke ripërsëristur të njëjtën deklaratë si krimi dhe politika, shtrohet pyetja kush është krimi dhe politika në rastin konkret?

Prokuroria nuk është se e mbylli dosjen e Saimir Tahirit dhe as nuk i pushoi hetimet, por i shkoi deri në fund.

Tani të dalë Luli e të kërkojë të falur!/CNA.al