Foto-Vijon protesta/ Flasin deputetë dhe qytetarë

21 Shkurt 2019, 10:02, Aktualitet CNA

Protesta e opozitës para parlamentit, ashtu sikurse ishte paralajmëruar ka filluar që prej orës 10:00.

Por, ndryshe nga protesta e së shtunës e cila degjeneroi në akte dhune, deri në këto momente protesta po zhvillohet në mënyrë paqësore.

Ndërkohë, një tjetër detaj që ndryshon nga protesta e 16 shkurtit, është fakti që sot janë mbajtur edhe fjalime.

Fjalën në protestë e kanë marrë edhe qytetarët edhe deputetët, të cilët po flasin me radhë.

Kujtojmë këtu se opozita ka thirrur qytetarët në protestë, dukie kërkuar largimin e kryeministrit Rama dhe krijimin e një qeverie tranzitore që do të përgatisë zgjedhje të lira.

Deputetët kanë dorëzuar publikisht mandatet e tyre. I pari ka qenë Ervin Salianji.

Ervin Salianji: Më datë 16 dëgjuam zërin e qytetarëve. Sot mandati im, mandati i Ervin Salianjit iu takon juve, fitore!
Nora Malaj: Mandati im për të gjitha gratë dhe vajzat që e duan Shqipërinë e lirë.
Luan Baçi: Mandati im është i juaji. Të gjithë bashkë ?Rama ik!?.

Gent Strazimiri: Përshëndetje njerëz të lirë. Si sot 28 vjet më parë Gramoz Ruçi bëri veprimin e parë si ministër i brendshëm i diktaturës. Sot pas 28 vitesh kryetari i parlamentit rrethon me tela me gjemba parlamentin sepse ka frikë nga populli.
Kejdi Mehmetaj: Mandati i deputetes nuk është i imi, mandati është i juaji, është i të rinjve dhe të rejave të Shqipërisë. Ta bëjmë Shqipërinë shtëpine tonë!

Klevis Balliu: Fuqia është e juaja. I themi këtij krimineli njëzëri: Rama ik. Sot është koha juaj dhe merrni në dorë fatet e vendit.

Shpëtim Idrizi: Jam sot këtu për ti thënë dallkaukut të përparimit: hapi rrugë shqiptarëve, zgjedhjeve të lira sepse shqiptarët do ta marrin vetë fatin e tyre në dorë. Nëse detyrove 4 mijë shqiptarë të iknin nga Shqipëria, sot ka ardhur koha të ikësh ti. Shqiptarët janë të gatshëm siç larguan komunizmin të të largojnë dhe ty. Nuk mundet taksat e shqiptarëve të shkojnë tek duart e pesë vetëve. I them o nëtëdhejetë e nëtshë largohu ose shqiptarët do të punojnë qindëshin.

Jorida Tabaku në protestë: Sot bëhemi bashkë për të larguar këtë shtet që ka kapur për fyti të gjithë. Sot bëhemi bashkë për të shporrur këtë qeveri dhe Ramën.

Dashamir Shehi: Ky zotëria që duam të përzëmë është e keqja më e madhe që na ka rënë në këto 3 vite. Nuk jemi pa të këqija por si ky nuk i kishte rënë Shqipërisë. Ky njeri që bredh poshtë e përpjetë duke u hedhur helmin shqiptarëve ky do të ndajë edhe Shqipërinë nëse e lënë. Por nuk kemi për ta lënë. Kjo rrugë nuk ka kthim prapa. Do vijë dita që do i kthehemi asaj salle, por do kthehemi si burrat.