Emëtimi i Eurobondit/ Ulet ndjeshëm risku për Shqipërinë

17 Janar 2019, 12:36, Aktualitet CNA

Ministria e Financave dfhe Ekonomisë, deklaron se Shqipëria emetoi me sukses vitin e kaluar një Eurobond 7 vjeçar me një interes historikisht të ulët prej 3.5%.

Në deklaratë ndër të tjera thuhet se Shqipëria përballoi me sukses një periudhë relativisht të vështirë financimi 2013-2015 pa rrezikuar asnjë pagesë të brendshme dhe të jashtme.

Sipas Ministrisë së Financave dhe Ekonomisë, tani rreziqet financiare, falë dhe reformave strukturore (pensionet, energjia) janë ulur ndjeshëm duke rritur sigurinë e shlyerjes të çdo detyrimi publik edhe detyrimeve të huaja në kohë.

Deklarata e plotë:

Në vijim të disa shkrimeve të ditëve të fundit mbi emetimin e suksesshëm të Eurobondit nga Shqipëria në vjeshtë 2018, në funksion të informimit të saktë dhe të drejtë të publikut, Ministria e Financave dhe Ekonomisë dëshiron të sqarojë si më poshtë:

Shqipëria emetoi me sukses vitin e kaluar një Eurobond 7 vjeçar me një interes historikisht të ulët prej 3.5%. Suksesi Eurobondit u përshëndet nga shumë partnerë ndërkombëtarë si FMN, BB dhe BE që vlerësuan përmirësimin e profilit të borxhit në zgjatjen e maturitetit. Një pjesë e Eurobondit rreth 200mln Euro u përdorën pikërisht për të ulur ri-pagesat e Eurobondit të vitit 2020 duke lehtësuar ndjeshëm financimin e Eurobondit të atij viti. Pjesa tjetër shkon për shlyerjen e kredive të huaja të viteve të kaluara pa rënduar tregun e brendshëm apo deficitin.

Borxhi publik ra ndjeshëm në 2018 në 67% të PBB dhe është në drejtimin e duhur për të arritur objektivin afatmesëm poshtë 60% të PBB. Kjo ka ulur ndjeshëm rrezikun por dhe koston e shërbimit të borxhit. Shqipëria përballoi me sukses një periudhë relativisht të vështirë financimi 2013-2015 pa rrezikuar asnjë pagesë të brendshme dhe të jashtme. Tani rreziqet financiare, falë dhe reformave strukturore (pensionet, energjia) janë ulur ndjeshëm duke rritur sigurinë e shlyerjes të çdo detyrimi publik edhe detyrimeve të huaja në kohë. Gjendja e likuiditetit të qeverisë që prej vitit 2016 ka qenë shumë e shëndetshme për të mos munguar asnjë pagesë të planifikuar në buxhet.

Shqipëria qëndron në nivelin B1/B+ nga agjencitë e vlerësimit duke reflektuar karakteristikat e ekonomive në zhvillim. Si çdo ekonomi në zhvillim investimi në Shqipëri mund të mbarti rreziqet e kësaj fashe gjë që bëhet transparente ndaj investitorëve nga agjencitë e vlerësimit dhe në dokumente shoqëruese si prospektusi . Thënë kjo, investitorët përtej rreziqeve të klasifikimit të vendeve sipas zhvillimit të tyre, vendosin në bazë të besueshmërisë që ata krijojnë nga situata ekonomike dhe reformat e një vendi të caktuar. Dhe suksesi i Eurobondit të fundit edhe për nga kërkesa e lartë e investitorëve, tregon që Shqipëria ka fituar një besueshmëri të madhe në tregjet ndërkombëtare.

T?u referohesh risqeve të përgjithshme të ekonomive në zhvillim në tërësi, për të përcaktuar rrezikun e Shqipërisë, është spekulim jo vetëm i gabuar, por edhe i dëmshëm për ekonominë e vendit dhe imazhin e saj.

Për këtë mjafton të vërehet sa shumë ndryshon vlerësimi i investitorëve për vende në të njëjtën kategori. Nga tregjet dhe investitorët Shqipëria vlerësohet një shkallë më lart se ajo e agjencive të vlerësimit që tregon dhe njëherë drejtimin e duhur të reformave dhe zhvillimit të ekonomisë.