Kush e përgatiti ligjin kundër studentëve?!

7 Dhjetor 2018, 12:01, Aktualitet CNA

Studentët e universiteteve publike, prej tre ditësh i kanë dhënë një leksion të mirë të gjithë kastës politike në vend. Ata janë ngritur në një protestë dhe tubim madhështor para Ministrisë së Arsimit, për të drejtat e tyre dhe duke u distancuar nga partitë politike.

Pikënisje e kësaj uragani studentor ishte ligji për Arsimin e Lartë, i vitit 2015, i cili pas tre vitesh dha provat e dështimit të tij.

Një ligj i cili u reklamua fort nga qeveria, u mbështet fort publikisht dhe zyrtarisht nga Henri Çili i UET, Alfred Lela dhe Romeo Gurakuqi të Henri Çilit dhe Lulzim Bashës.

Të tre këta individë, pra Çili, Lela dhe Gurakuqi ishin tre shpatat, të cilët kundërshtonin çdo oponencë që i bëhej këtij ligji dhe embronin publikisht.

Ky është një ligj i përgatitur nga qeveria e RIlindjes, i votuar nga LSI-ja në vitin 2015, kur kjo e fundit bashkëqeveriste me Ramën, dhe nuk u cua kurrë ne Gjykatë Kushtetuese nga opozita dhe loja e neveritshme që bëri në atë kohë Lulzim Basha, përjashtuar Jozefina Topallin, Jorida Tabakun, apo ndonjë zë tjetër ndryshe në PD, askush nuk doli kundër ligjit për arsimin e lartë.

Universitetet private ua mbyllën gojën të gjithëve. Kapën qeverinë dhe detyruan opozitën që mos ta çonte ligjin në Gjykatën Kushtetuese.

Në vitin 2015, në një prononcim ekskluziv për CNA.al, ishte vetë kreu i PD, Lulzim Basha i cili tha se do ta dërgonte për anullim në Gjykatën Kushtetuese ligjin për Arsimin e Lartë, se afati i fundit ishte data 6 dhjetor dhe për këtë ishte ngarkuar Ivi Kaso, por kjo nuk ndodhi kurrë.

Pra, ashtu si qeveria që e projektoi ligjin, LSI-ja që e mbështeti drejtpërdrejt me vota në parlament, edhe opozita që e miratoi me heshtjen e saj, duke mos e dërguar në Gjykatën Kushtetuese janë përgjegjës për ligjin kundër studentëve.

Sot nuk kanë fytyrë të flasin, as Rama, bashkë me ministren e tij që flet për ?katranjosa? dhe më pas u dorëzua pa kushte, as Lulzim Basha me deputetët e tij dhe sektin e Henri Çilit që e rrethon apo sharlatanët e ndryshëm që i vinë vërdallë, që dje thonin ndryshe e sot ndryshojnë fjalë e mbajnë ison e kunatit të Lulit, apo edhe vetë LSI-ja, e cila dje mbështeti Ramën dhe e votoi ligjin për Reformën në Arsimin e Lartë dhe sot flasin e bërtasin.

Në fakt të tre janë përgjegjës, për ligjin e Arsimit të Lartë, për Reformën në Arsim dhe për pasojat që sot po i vuajnë studentët./ CNA.al