Ekskluzive/ Rektori Mynyr Koni kërkon të vendosë “sulltanatin” në Universitet

8 Nëntor 2018, 09:31, Aktualitet CNA

Nga Xhovani SHYTI

?Në Universitetin e Tiranës konstatohen problematika të administrimit të brendshëm, kryesisht nëpërmjet bllokimit të procedurës së brendshme të protokollimit, delegimit dhe vulosjes së praktikave shkresore, duke sjellë konfuzion në ushtrimin e funksioneve nga të gjitha organet dhe autoritetet drejtuese të UT-së?,- lexohet ndër të tjera në hyrje të një raporti të hartuar nga grupi i punës i Ministrisë së Arsimit Sportit dhe Rinisë (MASR), që CNA.al e disponon.

Në përbërje të këtij grupi janë Alqi Kushi, Mirela Bimo, Jeton Shehu, Iva Beliu dhe Bledar Biçoku. Raporti, me më shumë se 100 faqe, i hartuar prej këtyre të fundit, në përfundim të kontrollit të ushtruar përgjatë muajve shkurt-mars 2018, përmban gjetje që bien ndesh me ligjet dhe synojnë përpjekjet e rektorit në detyrë, Mynyr Koni për të anashkaluar strukturat e tjera kolegjiale brenda UT-së. Me qëllim komandimin e gjithçkaje nga ai vetë.

Domethenë vendosjen e ?sulltanatit? komandues përkundër kolegjalitetit që garanton demokratizimin e mëtejshëm, aq shumë të domosdoshëm për këtë institucion tejet të rëndësishëm të arsimit të lartë.

Sikurse bëjnë të ditur për CNA.al burime konfidenciale brenda stafit të afërt të kabinetit Koni, kontrolli i ushtruar nga grupi i MASR ka marrë shkas nga një ankesë që katër dekanë të fakulteteve të Ekonomisë, Gjuhëve të huaja, Juridikut dhe Shkencave sociale, i kanë adresuar kryeministrit Edi Rama një vit më parë.

Përveç një sërë fakteve të rreshtuara, që mbështesnin akuzën e ngritur ndaj Konit për paligjshmëri në mënyrën e drejtimit të Universitetit, letërshkruesit i kërkonin Kryeministrit shkarkimin e Mynyr Konit nga posti i rektorit, gjë që nuk dihet nëse do të ndodhë, kur edhe raporti i grupit kontrollues të Ministrisë i ka mbështetur me fakte si akuzën ashtu edhe pretendimet e katër dekanëve.

Ndërkohë, në ndjekje të raportit, po nga burime konfidenciale të CNA.al, brenda Prokurorisë së Krimeve të Rënda, mësohet se mbështetur në raportin e sipërcituar institucioni i hetimit ka filluar kallëzimin penal ndaj rektorit Koni, për të cilin në nisje të raportit grupi i kontrollit të Ministrisë citon: ? Nga procesverbalet e mbledhjeve të organeve kolegjale, por dhe nga korrespondencat zyrtare, midis autoriteteve drejtuese akademike, konstatohen mosmarrëveshje të vazhdueshme midis palëve, si për shembull: midis Rektorit me drejtues të njësive kryesore, Rektorit me ish-Kancelarin, (administratorin e komanduar), Rektorit me Administratorin e ri.

Kryesisht ka pasur pretendime për procedurat e punësimit të personelit akademik, mbi kompetencat ndaj personelit administrativ, mbi pezullimin nga detyra të ish Kancelarit, mbi vartësinë e strukturave (audit), midis Rektorit dhe Bordit të Administrimit apo Administratorit, në protokollimin e shkresave zyrtare të nxjerra nga autoritetet dhe organet drejtuese të UT dhe përdorimit të vulës/vulave nga organet drejtuese të rektoratit.

Gjithashtu konstatohet ushtrim funksionesh dhe kompetencash nga ana e organeve dhe autoriteteve drejtuese të UT në kapërcim të kompetencave të dhëna nga kuadri ligjor në fuqi e duke shkaktuar shkelje të ligjit dhe dëme financiare.?

Janë konstatime për të cilat, sikurse konfirmojnë burimet brenda zinxhirit komandues të institucionit, ndonëse drejtuesit të UT-së i janë lënë jo pak muaj kohë për ti ndrequr vijojnë të jenë prezente edhe sot e kësaj dite./ CNA.al