Shifrat alarmante të kriminalitetit në vend/ Tejmbushen burgjet shqiptare

20 Tetor 2018, 12:19, Aktualitet CNA

Niveli i kriminalitetit, vështruar për nga dinamika-intensiteti, llojet, përmasat e akteve tepër të dhunshme e me pasojë të rëndë, grafiku në rritje i krimeve kundër personit, i jetës dhe shëndetit, zhvillimet galopante të trafiqeve, sidomos të lëndëve narkotike vijon të jetë në shifra alarmante në vendin tonë.

Vrasje, grabitje, plagosje etj, çdo ditë mbushin kronikat televizive, faqet e gazetave apo dhe të portaleve online. Por, shifrat alarmante të kriminalitetit në Shqipëri përveç pasojave të tjera, ka sjellë edhe një tejmbushje të burgjeve. Shqipëria shifrën më të lartë të të burgosurve në rajon.

Sipas të dhënave të organizatave ndërkombëtare, Shqipëria, ka 5.447 të burgosur, që përbëjnë rreth 0.2 % të popullsisë, e barabartë në normë me Poloninë dhe Sllovakinë. Serbia, një tjetër shtet i rajonit, ka normë më të ulët të të burgosurve ndaj totalit të popullsisë, me rreth 10 mijë të burgosur por me normë 0.11 %. Edhe Maqedonia e ka normën më të ulët se sa në vendin tonë, me rreth 3 mijë të burgosur dhe normë 0.15 %.

Përtej kësaj duhet theksuar edhe një detaj tjetër, shifrat e mësipërme flasin vetëm për të burgosur brenda Shqipërisë, pa folur pastaj për të burgosur shqiptarë nëpër Europë. Shqipëria është bërë turpi i botës, edhe në raport me shtetasit e saj që dergjen burgjeve të Europës apo edhe të botës. Gjë e cila raportohet jo rralllë edhe nga mediat e huaja.

Por, pse ndodh kjo?

Në radhë të parë, duhet të theksojmë këtu mungesën e masava parandaluese për ngjarjet kriminale, gjë e cila do të reduktonte ndjeshëm këto shifra alarmante.

Një tjetër faktor janë edhe politikat sociale për edukimin e të rinjve dhe punësimin e tyre.

Varfëria në vend, po ashtu është një tjetër shkak madhor që ndikon në rritjen agresive të kontigjentit kriminal. Në Shqipëri mungon optimizmi, besimi, shpresa. Kështu nxitet ikja, largimi ose rrëmbimi në rrugë kriminale, pra të jetosh me vjedhjet me grabitjet.

Vëmendje më e madhe duhet ti kushtohet shtresave të varfra, gjë që kërkon hapësira për angazhime dhe veprimtari ekonomike si dhe duhet të ndryshojë metoda e punës për: Afrimin në komunitet, parandalimin e krimit në rradhë të parë tek të miturit, vëmendje të miturve që braktisin familjet./CNA.al